Элстин багш цугәрәсән марһана лауреатын нер зүүв
Элст балһсна арвн тавдгч школын информатикин багш Аркадий Муниев педагогическ дебют нертә номинацд сән үзмж бәрв. Москва балһснд болсн цугәрәсән марһанд баһ наста багш лауреатын нер зүүв. Иим сән күцәмж танһчин эрдм-сурһулин туужд түрүн болж бәргдв.
Цугәрәсән марһана товчлгч девснгд орлцхин төлә мана танһчин баһ наста багш региональн дөрлдәнд чанһ шүүврт орад, диилвр бәрсмн. Аркадий Муниевд Хальмг танһчин нер харсхд амр биш болв. Товчлгч девснгд Әрәсән һучн тавн регионас хамгин сән багшнр орлцв. Энүнд орлцачнр секәтә кичәлмүд кев, хөөннь энүг шинжлв. Тер мет Аркадий Муниев эврәннь төсвән хальмгин амн үгин зөөр нертә электронн эв-арһ үзүлв.
Иим күцәмж хальмгин багш бәрснь нуувч биш. Баһ наста багш бичкдүдт йир дурта, эдниг сәәнәр медж, сурһульчнр медрл авхд сән тус күргнә. Тер мет эврән бас шин медрл авхар оньдин зүткнә. Эннь баһ наста багшд көдлмштнь сән дөн болна, жирһлин хаалһд чигн туслжана. Зуг эврәннь күч-көлсәр иим сән үзмж бәрж чадв. Энүнлә хамдан көдлжәсн багшнин келсәр, Аркадий оньдин талдан улст нөкд болхдан белн, һольшг сән зангта күн.
Элст балһсна арвн тавдчг школын директорин дарук Баира Мукаеван келсәр, баһ наста болв чигн, соньн кичләмүд өгнә. Зәнглһнә эв-арһ болн компьютер йир сәәнәр медәд, бичкдүдт гүн медрл өгчәнә. Дәкәд болхла Аркадий Муниев хальмг келндән хару күн. Хальмг улсин авьяс зангшал сәәнәр меднә.
Эврәннь күцәмжин тускар баһ наста багш келхдән дурлхш. Эннь цуг багшнрин нилч бәәнә гиж келнә. Энүнд дөн болсн улст ик ханлтан Аркадий Муниев өргжәнә. Тер тоод баһ наста багшд энүнә өөрхн улснь, хамдан көдлжәх әмтн болн «Постижение» нертә педагогическ клубын гешүд нөкд болв. Сурһульчнр болхла эврәннь багшарн ик бахмж кеж, байрлжана. Аркадий Михайлович йир сән багш. Энүнә кичләмүд таасгдна гиж эн көвүн келв. Эн күүкнә келсәр, кичәлин төриг тодрха кевәр цәәлһнә. Марһанд орлцад диилвр бәрхинь дурдж.
Иим кевәр дөннжәх сурһульчнрла хамдан баһ наста билгтә багш ирчгдән чигн олн-зүсн марһаст диилвр бәрхнь лавта.
Елена Алексенко, Бадмаран Владислав
