Искусствин училишд тооцана концерт болв
Хальмгин искусствин училишд сурһулин жил төгсхин өмн өргнд күцәгддг нег дааврта керг-үүлдврнь — оютнрин тооцана концерт. Эн жил Калмгосфилармоня ик залд болсн концерт онц чинр зүүжәнә. Искусствин эрдм-сурһулин учрежденьд одахн шин чинр зүүлһгдв. Ода эн учреждень Петр Чонкушовин нертә искусствин Элст балһсна колледж гиж нерәдгднә. Олн хәләһәчнр үзүлсн программ соньн бол ник болв. Тер тоод келн-улсин, классическ болн эстрадн эрдм олна оньгт тусхагдв. Ода колледжд арвн тавн эрдмәр баһчуд сурһуль дасчана. Концертд танһчин үүдәлтин бәәшнгин медлд үүлджәх этношколын сурһульчнр бас орлцв. Колледжин директор Любовь Горяеван келсәр, сурһулин учрежеднь төгсәсн баһчуд көдлмш олж авчана. Эдн профессиональн коллективмудын ханьд орж көдлжәнә, Әрәсән деед сурһулин заведеньд орж сурад, дамшлтан өөдлүлжәнә.
