Сарпинск районд махна комбинат төсгджана

Удл уга Хальмг танһчд мах эд-бод кедг дәкәд нег комбинат экләд көдлх. Сарпинск района Уманцево селәнд ик махна комплексин тосхлт төгсжәнә. Специалистнрин тоолврар, түрүн авгтан шин предприятьд өдртән тәвн толһа бод мал эд-бод кегдх, нег селгәнд тавн тонн белн продукц кеж һарһгдх.

Эндәс хойрдгч давхрас цуг цехмуд ил үзгднә. Комплексин һардач Зинаида Чавычалова тосхлт хәләчкәд үүмәд бәәнә. Нег жил хооран эклсн тосхлт ода төгсж йовна. Энүнд цуг һол конструкц углж тәвгдв. Эдн удл уга производствд экләд көдлх. Эднә көдлмшиг электрозалһлданд орулхла шинжлж хәләж болх. Ода обьектд кесг бригад дегц электрокүчнә залһлда татжана. Көдләчнр толсхлтын цуг участкст көдлжәнә.

Энүнд кергтә цуг оборудовань авч иргдв. Эднә зәрмнь цехмудт орулгдв. Тосхлтын участкин ахлач Андрей Чавычаловин келсәр, ода тосхлтын көдлмшин бичкн әнгнь үлдв. Оборудованиг удл уга экләд углж тәвх. Тер мет киитрүлин камермуд бас энүнд углж тәвгдх зөвтә.

Тосхлтын участкин ахлач Андрей Чавычаловин келсәр, эн эрснә ард ик компрессормуд бәәнә. Москва балһснас специалистнр ирәд, оборудовань углж тәвх. Иим дөрвн установк бәәнә.

Келхд, дөрвн киитрүл олн-зүсн кемжәһәр продукц киитрүлж чадх. Иим нег гүүнән киитрүлдг камерин тускар келхлә, иим киитрүл Өмн үзгин федеральн округд нег чигн предприятьд уга.

Тосхлтын участкин ахлач Андрей Чавычаловин келсәр, шин предприятин пол зевршго төрәс кегдв, орань бас тиим. Киитрүлд һучн тавн градус киитн болх зөвтә. Иим оборудовань дәкж Өмн үзгин федеральн округд уга болжана.

Хальмгин олн-әмтнә хуралд танһчин толһачин элч Виталий Дагинов тосхлтд дару-дарунь ирнә. Энүнә келсәр, Уманцево селнәд тосхгджах мах эд-бод кедг комбинат темдглсн болзгт эдлврт орулгдх. Тосхлт эклснәс авн эн программд инвестор орлцх санаһан медүлснәс хөөн, энүнд мөнг орулжах арһлачнр темдглсн төсвән эрк биш күцәх гисн иткл орв. Келхд, Станислав болн Борис Ильяновихн Хальмг танһчд төрж өссн улс болжана. Эдн эрдмән сәәнәр меддг специалистнр. Москва балһсна хамгин сән гисн деед сурһуль төгсәснә хөөн, олн-зүсн бизнес-структурмудт көдлв.

Хальмгин олн-әмтнә хуралд танһчин толһачин элч Виталий Дагиновин келсәр, эн баһчуд эврәннь үлгүрәрн ямаран көдлмш кеж болхинь үзүлжәнә. Төрскн һазртан батрулсн улан яж олзлхинь медүлв. Энд школан төгсәһәд, Москвад сурв. Тенд кергтә хәрлцә бәрәд, энүг ода олзлжана. Иим улсин нилчәр шин предприять экләд көдлх.

Специалистнрин тоолсар, түрүн авгтан шин предприятьд өдртән тәвн толһа бод мал эд-бод кегдх. Нег селгәнд тавн тонн белн пролдукц кеж һарһгдхмн. Ваакумн цуглад мах кеж һарһлһн Уманцевин махна комбинатын һол продукц болж юарх. Эннь талдан предприятьмудас йилһрх. Малын цуг махн эд-бод кегдх. Энүнәс пельмень, котлет болн талдан чигн белн продукц кегдхмн.

Комплексин һардач Зинаида Чавычаловин келсәр, хальмгин малын махн сән чинртә. Энүг вакуумн цуглад ораһад хулдх зура бәәнә. Тиигхлә эд-таврин бәәдл һарх.

Өдгә цагин некврлә ирлцәтә мах эд-бод кедг предприять Сарпинск района Уманцево селнәд тосхснь бас учрта.

Сарпинск РМО-н администрацин толһач Юрий Жуковин келсәр, энд усн районд хамгин сән чинртә. Нег үлү, усн күртх. Иим предпряитьд усн дала кергтә. Хаалһ бәәнә, газ нааран ирв. Цуг кергтә таал бүрдәгдв. Тегәд энд иим предприять көдлж чадх.

Района бәәрн һардачнрин тоолврар, шин предприять эдлврт орхла, района экономик делгрлт авх зөвтә. Сарпинск РМО-н администрацин толһач Юрий Жуковин келсәр, шин предприятин өөр мал бордлһна плошадкс көдлх. Энүнд нәәмн-арвн минһюн толһа бод мал өскх зура бәәнә. Ода дәкәд нег инвестор орд ирв. Эннь “Степной” СПК. Эдн энүнд тавн минһн толһа бод малын плошадк бәрх саната. Эннь районд мал өсклһнд сән урмд өгх зөвтә.

Районд тосхгджах түрүн мах эд-бод кедг шин предприять эн жилин май сард экләд көдлх зөвтә.

Чучян Валентина, Очра Сергей