Негдгч класст орх бичкдүдиг школд бичж авчана
Школд түрүн болж орх бичкдүд бичгдж авгджана. Сурһулин шин жил күртл цаг бәәв чигн, негдгч класст орх көвүд-күүкдин эк-эцкнр эн төриг оданас авн экләд хаһлх зөвтә. Документ августын нег шин күртл орулж авгдх. Статистикин то-дигәр, негдгч класст сурх көвүд-күүкдин то өсәд йовна. Сентябрин нег шин күртл школд сул орм үлдшго бәәдлтә.
Эклц классмудын багш Анжела Казимирова хөрн тавн жилд көдлснә ашт хойр зун көвүд-күүкдиг сурһад, гүн медрл өгв. Эн жил школд түрүн болж ирх нәәмдгч класс орулж авхар күләжәнә. Жил ирвәс бичкдүдин то өсәд йовна. Ода Элст балһсна һурвдгч школд эклц классмудт дөрвн зун найн дөрвн көвүд-күүкд сурчана. Эднәс негдгч һурвн класст зун хойр сурһульч орв. Эн жил болхла дөрвн негдгч класс орулж авх кергтә.
Элстин һурвдгч школын эклц классмудын багш Анжела Казимирован келсәр, эн жил негдгч класст сурх сурһульчнр “Гармония” нертә сурһулин программар сурх. Мана школ эрдм-сурһулин шин государственн кемжәһәр цаарандан көдлжәнә.
Ода негдгч класст көвүд-күүкд шүүвр угаһар оурлж авгдна. Сурһулин заведеньд сул орм уга болхла эдн талдан школд одх. Тер саамд зәрм школмудт эклц классмудт сурһульчнр дегд дала болжана. Эн төриг Әрәсән эрдм-сурһулин министерствин батлж авсн шин шиидвр халһх зөвтә. Шин закаһар эн жилин мартын нег шинәс авн негдгч класст хамгин түрүнд школын өөр бәәх эк-эцкнрин бичкдүд орулж авгдхмн. Элст балһсна һурвдгч школын директорин дарук Анжелика Бадма-Горяеван келсәр, ода школмудт сурһульчнр дегд олн. Маша школын өөр бәәх бичкдүдиг оурлж авхла, багшнрин көдлмш дигтә-дарата болх. Эклц классмудт дегд олн бичкдүд бәәхлә, багшнрт күнд болна.
Эк-эцкнр эврәннь үрән талдан школд орулж чадх. Зуг эдн августын нег шинин зөөн сурһульчнран талдан школд сул орм бәәхлә орулх закан һарв. Хамгин түрүнд школ эврәннь сурһульчнран орулж авсна хөөн, талдан һазрас ирсн көвүд-күүкдиг орулж авч чадх.
Элст балһсна администрацин эрдм-сурһулин заллтин әнгин ахлач Елена Ширипован келсәр, негдгч класс орх бичкдүдин эк-эцкнр марытн нег шинәс авн сентябрин нег шин күртл эрлһ орулж өгч чадх. Зуг школ эднә герин өөр бәәх зөвтә. Кемр талдан школд орх саната болхла, тенд сул орм бәәхлә, авгсутын нег шинин хөөн эрлһ болх.
Негдгч класст бичкдүдиг орулж авдг кергиг гиигрүлхин төлә электронн эв-арһ олзлгдх. Жил ирвәс негдгч класст орх бичкдүдин то өсәд йовна. Эннь байрта йовдл болжана. Эн жил Элтс балһснд күсдундур минһн көвүд-кеүүкд негдгч класст орх. Ода деерән классмудт сурһульчнр дегд ик болх гиж келхд эрт. Эннь сентябрин нег шин өөрдәд ирхлә медгдх. Эн жил хотл балһсна школмудт негдгч класст ирх көвүд-күүкдин төлә тәвн һурвн класс белн болх.
Бевина Мергн, Колдан Церн
