Келн-улсин театрт «Трактиршица» нертә наадна түрүн үзүлвр болхмн

Карла Гольдони тәвсн «Трактиршица» нертә наадна түрүн үзүлвр эндр болн манһдур келн-улсин театрт болхмн. Театрт дурта улс эн шогта спектаклиг таасж хәләнә. Хальмгин хәләһәчнр болхла, түрүн болж үзхмн.

Хойр сарин эргцд эн наад тәвхин төлә көдлмш кегдсмн. Сценографьд болн сцен кеерүлһнд онц оньг тусхагдв. Ахр цагин болзгт Гольдони цага хувц-хунр болн өлг-эд белдгдв. Актермудын наадн болн режиссерин тәвсн седвәр һол орм эзлнә.

Спектаклин режиссер Сергей Бурлаченко келсәр, ямаран болв чигн билг-эрдм сән. Тегәд режиссер болһн соньн болн өврмжтә наад тәвх күсл өмнән тәвнә. Спектакль ямаран болхнь хәләһәчнр үнлх.

Мирандалина сәәхн күүкнә һол дүриг мана танһчд нертә артистк Гиляна Бембеева наачана. Энүнә байн репертуарт түрн болж шог наадна дүр үзүлхмн. Тегәд чигн үүмәтә бәәнә.

Хальмг Танһчин ачта артистк Гиляна Бембееван келсәр, йириндән би трагическ дүр наадг биләв. Тегәд шин дүриг һурвн-дөрвн наадн давсн хөөн ижлдхв гиж санжана.

Цаһан седклтә болн невчк әәмтхә мухлаг баһ наста актер Санл Носонов наачана. Эн дүр бас шин болжана. Тегәд сценическ эв-арһ олзлад, режиссерин өгсн дүриг сәәнәр наадхар зуратав.

Санл Носоновин келсәр, энүнә наадх дүр йир таасгдна. Эн байн дүриг сәәрүлж арһ-чидлән әрвлго наадх саната.

Дурни туск «Трактиршица» нертә наадна йовдлмуд 18гч зун жилд флорентийск селәнд болжана. Режиссерин ухан-тоолврарөдга цагин некврлә ирлцүлж эн наадн тәвгдв. Шогта спектакль хәләһәчнрт таасгдх гиж актермуд иткжәнә.

Азыда Надежда, Хулхачин Николай