Хальмгин спортменмүд әрәсән чемпионатд диилвр бәрв

Санкт — Петербург балһснд болсн әрәсән чемпионатд хальмгин спортменмүд диилвр бәрв. «Мутокукай Калмыкия» клубин элчнр һурвн алтн, нег цаһан болн хойр күрл мөнгн медальмудар ачлгдв.

«Дайто рю айкидзюдзюцу» Японь орн нутгин кезәнк дәәнә билг эрдм болжана. Эднә тоод « Мутокукай» школ орна. Клубин спортсменмүд олн зүсн марһасд орлцж ончрна. Санкт-Петербургд болсн чемпионатд бас сән үзмж бәрәд, Танһчиннь нерән туурулв.

Хальмгин айкидо федерацин президент Олег Куберлиновин келсәр, көвүд диилвр бәрхин төлә урдаснь сән белдвр кеһәд, билг эрдмән үзүлв. Шүүгдәд чигн бәәхвидн гисн санан орад бәәв гиж эн темдглв.

Марһана түрүн өдр кумитэ халхар зер —зев олзлж ноолдсн Олег басангов цаһан мөнгн медаль шүүж авв сән техник үзүлснә ашт һурвдгч ормд һарв. Тер мет Очр ермошкаев хойр алтн болн нег күрл мөнгн медальмудар ачлгдв.

Олег Басанговин келсәр марһана өмн үүмәтә бәәв. Юнгад гихлә иим чинртә марһанд түрүн болж орлцжанав. Тиим болвчн диилвр бәрвидн.

Очр Ермошкаевин темдглсәр, иим марһас сән дамшлт хоршаллһнд сән нилчән күргнә. Спортар дамж мана танһчин тускар олнд күргж медүлжәнәвидн.

Маднд интервью өгсн хөөн спротсменмүд белдврән эклв, тогтсн авьясар энүгән спортсменмүд мендллһнәс эклв. Эн спортар бөдүн улс чигн бичкдүд чигн соньмсна. Хамгин ах гиснь жирн наста Лижин Барла. Нааран хойр жил хооран ирж цогц махмудан батрулх шиидвр авсмн.

Барла Лиджиевин келсәр, эн спортар баһчуд соньмсна, эрүл менд туста болжана. Темдгләд келхд, эн хальмг клубин элчнр Әрәсән сән гисн спортсменмүдин тоод йовна.

Бевина Мерген, Бадмаран Владислав