Ик-Буурла районд диспетчерск церглт көдлжәнә
Танһчин әмтнд өдр-сө уга эмчнр, электрикүд, Калмгазин көдләчнр, полиц болн МЧС нөкд болх. Ода Хальмгин райодт болн Элст балһснд диспетчерск церглтин көдләчнр олн улсин зәнгиг телефоһар бичж авчана. Ик-Буурла районд иим церглт хамгин түрүн экләд көдлжәнә.
Ик-Буурла РМО-н администрацин герт углж тәвгдсн диспетчерск церглтин олн каналта телефоһар олн әмтн өдр-сө уга гилтә жиннүлнә. Диспетчер Даниил Галеусовин келсәр, зәрмдән нег өдр тәвн күн жиннүлж дөн сурна. Ик-Буурла РМО-н диспетчесрк церглтин көдләч Даниил Галеусовин келсәр, ода нег зәнг ирв. Бичкн көвүн давшурас унв гиж залу күн жиннүлв. Ода эмчнрт зәнг өгвхидн.
Түрүн күн нааран давн жилин октяюрин нег шинлә жиннүлв. Мана танһчд ик-буурлахн хамгин түрүн болж 911 теелфона тойгта американск церглтлә әдл церглт бүрдәж чадв. Ода энд дөрвн диспетчер селгәһәр көдлжәнә. Бачм чинртә йовдлмудын района комиссин ахлач Александр Владимировин келсәр, олн улсас эдниг чанһ неквртәһәр шүүж авч. Компьютер олзлдг эрдм энүнд һол неквр болсн уга. Жиннүлсн әмтнлә күүндж чаддг улс кергтә. Зәрмдән иим күүндвр ик чинртә болна. Шин церглтин икдүләд, шин техник хулдж авхар район зуралжана. Эн туст хаһлх төрмүд дала. Ик-Буурла РМО-н администрацин толһачин дарук Александр Владимировин келсәр, ведомствс хоорнд зәнгәр хувалцх шиидвр бәәнә. Зуг акционерн ниицәс иим зәнг нуувч гиж келнә. Эднә һардачнрла зөвшәлт бәәнә.
Нааран жиннүлсн күүнә күүндвриг автомат бичж авна. Энүнә хөөн диспетчер кергтә цергтлә залһлда бәрж, әмтиг үүмүлжәх төр күцц хаһлхинь бүрткнә. Ик-Буурла РМО-н администрацин гражданск харслтын әнгин ахлач Ренат Беликовин келсәр, электрокүч өглһнә төрәр олн күн жиннүлнә.Үвлин кемд котелна көдлмшин тускар олн зәнг иржәнә. Газар, электрокүчәр тетклһнд завср учрна. Мөс хәәлүлх кергтә болжана.
Диспетчерск церглтд ямаран чигн телфонас жиннүлж болх. Кемр тана өөр стационарн телефон уга болхла, мобильн телефон эс көдлсн бийнь жиннүлж болжана. 112 тойгар жиннүлхлә, тана өгсн зәнгин телефон бичж авх. Ик-Буурл селәнә бәәрн күн Елена Корсаеван келсәр, герт электргерл уга болда диспетчерск церглтд жиннүлв. Ода телефона тойгуд сольгдв. Жиннүлхд жанһрта билә. Ода болхла амрар 112 тойгар жиннүлж болх. Диспетчерт жиннүлсн хөөн, хөрн минут болад көдләчнр электрокүчнә сунһуг ясв.
Ода района бәәрн әмтн иим телефо олзлад, ижлдәд бәәв. Бачм чинртә йовдл учрсн кемд диспетчерск церглт тер дарунь кергтә дөн күргжәнә. Ирчгдән эн халхар шин зура күцәгдх гиж района һардвр иткүлв.
Хавтхна Элла, Очра Сергей
