Бөк Баатр Имеев нәәм дәкж Жанһрин марһанд диилвр бәрв
Хальмг танһчд жил болһн келн-улсин сойлын болн спортын Жанһрин байр болна. Энүнд танһчин цуг райодын болн Элст балһсна элчнр орлцна. Тедн дунд Жанһрин байрин туужд хамгин сән халх бичсн әмтн бәәнә. Теднә тоод Жанһрин марһанд нәәм дәкж диилвр бәрсн Баатр Имеев йовна.
Манһдур арвн негдгч Жанһрин байр болх. Баатр Имеев түрүн болж Жанһрин байрт йирн доладгч жилд орлцв. Эннь энүнә спорын туужд темдгтә йовдл болв. Бөкнрин марһаг ода күртл йир сәәнәр тодлна. Иим байр йирин спортын марһан болсн деерән йоста олн-әмтнә дөрлдән болв. Энүнд диилвр бәрхд күндтә болдгинь Имеев сәәнәр медж авсмн. Тегәд чигн эрк биш түрүн орм эзләд, ончрх сана зүүв. Тиигхд найн килограммин чиннүрт Баатр ноолдв. Тогстн авьясар эн категорьт оньдин хамгин сән бөкнр чидлән сөрнә. Аштнь Баатр Имеев диилвр бәрәд, күнд мотоциклар мөрәлгдв. Энүнә хөөн Баатр Имеев нәәм дәкж Хальмг танһчин олимпиадын дииләч болв.
Ода энүнә күцәмжиг нег чигн күн давж һарад уга. Спортын ветеран Баатр Имеевин келсәр, иим марһан мана танһчд хамгин ик чинр зүүдг билә. Советин йосна цагт оньдин дөрлдән болдг бәәсмн. Цаг сольгдсн бийнь, иим марһан ода күртл хамгин мартшго йовдлд хүврв. Тиигхд йирдгч жилмүдт талдан бөкнр ноолдг билә, ода болхла баһчуд ирв.
Бөк бәрлдлһнә эрдмиг Баатр Имеев көвүдтән дасхв. Энүнә хойр көвүнь ода бөк ноолджана, олн-зүсн дөрлдәнд орлцна. Баатр Имеев болхла тренер болж көдләд, бичкдүдлә дамшлтарн хувалцжана. Энүнә сурһульчнр дунд билгтә көвүд бәәнә. Эдн ода сән үзмж бәржәнә. Тер тоод арвн һурвн наста Курбан Абдуллаев. Эврәннь тренеран дураһад, чанһ-чиирг болхар зүткжәнәв гиж Курбан келнә.
Ода эн көвүн танһчин, цугәрәсән болн нарта-делкән марһасин призерин тоод орна. Спортар зурһан настаһасн авн соньмсв. Курбан Абдуллаевин келсәр, оданас авн Жанһрин байрт белдвр кежәнә. Өсхләрн эврәннь тренеран дурах саната. Бөк бәрлдлһн йир олз-туста болна, чанһ-чиирг болхд туслна гиж көвүн келнә.
Баатр Имеевин тоолврар, иргчдән эн көвүд сән күцәмж бәрх ицл бәәнә. Оданас авн эдн цугтан эрк биш диилвр бәрхәр зуткнә. Баатр Имеевин келсәр, бөк бәрлдлһнә янз болһн күүнә занг батрулна. Йир күнд спорт болжана. Энүнд хамгин теслттәнь болн чанһ-чииргнь үлднә.
Арвн негдгч Жанһрин байрт Баатр Имеев зарһч болж көдлхмн. Иргчдән энүнә сурһульчнр бас иим ик чинртә дөрлдәнд орлцж чадх гиж Имеев нәәлжәнә. Улан залата хальмг улсин туужд эдн эврә нерән орулад, уул авьяс зангшал делгрүлһнд бас тәвцән орулхмн.
Ээнән Ольга, Бадмаран Владислав
