Инвалидмудын төлх тосхсн зәрм пандусмуд кергтә кемжәнлә ирлцжәхш

Ода Элст балһснд инвалидмудын төлә олн-зүсн пандус тосхгдв. “Доступная среда” нертә керг-үүлдвр Әрәсәд зарлгдсн билә. Нег жил хооран эн программ Хальмгин хотл балһснд экләд күцәгдв. Энүнә нилчәр иим улс жанһр угаһар гермүдт орад, эврәннь кергән күцәж чадх гиж зуралгджала. Болв зәрм ведомствс иим дуудвриг сонсад, пандусмуд тосхв. Болв энүгәр инвалид улс әәмшг угаһар деегшән давж чаджахш.

Арнзл Болдыревин темдглсн хаалһар йовхар шиидвидн. Хальмгин университетин герәс Ээлән Овлан бумб күртл йовх зура бәәнә. Хамгин түрүнд эн күн университетин герт орхар седв. Зуг энүнә хаалһд пандусин ормд бордюр харһв. Тергәр йовдг инвалид күүнд иим герт талдан күүнә дөнг угаһар орж болшго. Дәкәд болхла үүдн дегд үүтьхн. Энүг давж һарад, эн күн герт орв. Болв этаж давшхд нег үлү жанһрта болна. Арнзл Болдыревин келсәр, инвалид улст сән таал бүрдәх кергтә. Иим улс дунд болн деед сурһульд сурх арһта болх зөвтә.

Цааранднь Элст балһсна муниципалитетин герт одх зура бәәнә. Болв энүнә өмн хаалһ давж һарх кергтә болв. Ода хотл балһсна цутхлнг уульнцар тергәр ойвдг инвалидмудт йовхд невчк амр болв. Зәрм һазрт бордюр суһлж авч. Иим көдлмш шишлнг программар нег жил хооран эклсн билә. Тиигхд Владимир Путина седәвриг Хальмгин хотл балһснд зәрм депутатнр дөннв. Тер тоод Александр Команджаев йовна. Эн күн эврән учрежденьсин ахлачнрла харһад, пандусмуд углж тәвхин тускар болн социальн обьетмудт хаалһ ясхин тускар сурв. Нег үлү, иим программ күцәхин төлә мөнгн йилһж өггдв. Элст балһснд бәәх инвалидмудын эн зәнг сонсчкад байрлв.

Эн төрт оньг өгсн һардачнрт эдн ханлтан өргжәнә. Тер саамд Арнзл зөвәр амрар мэрийн герт күрв. Ода тергәрн герт орх кергтә. Талдан улсин дөн угаһар әрә гиж деегшән давшв. Болв деерәсн бууж ирхд күнд болна. Иим обьект кехин төлә һарһсн мөнгн харм болжана. Арнзл Болдыревин келсәр, инвалид улс йовдг хаалһ кергтә кемжәнлә ирлцжәхш. Зәрм һазрт талдан улсин дөн угаһар йовж болхш. Эннь һундлта болна.

Эн обьект болхла хоосн панудсин нертә. Онц келхд, иим эв-арһиг “Доступная среда” нертә инвалидмудын төлә күцәх дааврта ведомств кесн бәәж. Эннь алнг болжана. Арнзл Болдыревин келсәр, эн төриг специалистнрла күүндәд хаһлж болх. Инвалид улст деегшән давшхин төлә шишлнг оборудовань кергтә болна. Иим эв-арһар көгшн улс чигн деегшән һарч чадхмн.

Тосхсн пандус олзлж болшго һазр ода Элтс балһснд дала. Иим көдлмшиг хоосн цааснд темдг тәвхәр кесн бәәдлтә. Баһ наста инвалид улсин сул цагиг сергмжтәһәр давулхд хол Италяс ирсн күүкд күүнд чидл күрв. Инвалид күүкдиг эврәннь асрмжд авад, Элст балһснд үлдв. Ода энүнә герт иим улс дурндан ирәд, дөн сурж чадхмн. Нааран ирсн әмтн эврәннь дурта эрдмәрн сул цагтан көдлж чаджана.

Энд иим улс хувц өлгнә, зургуд зурна, цевр аһар киилж һаза наадна. Дәкәд болхла италь кел дасжана. Италяс ирдг волонтермуд угаһар күнд болх билә гиж эн күүкд күн келнә. Альберта Деклара келсәр, иим әмтн хоорндан күүндәд, чеежән сергәж чаджана.

Ода белдгджәх танһчин шишлнг программ иим улсин хурц төрмүдиг хаһлх зөвтә. Хальмг танһчин эрүл-менд харлһна министерствин әнгин ахлач Евгения Гордееван келсәр, шин программд цуг социальн обьектмуд орх, эрдм-сурһулин, сойлын болн залһлдана халхсар цуг керг-үүлдврмүд темдглж авгдхмн. Темдглсн цуг керг күцәгдх. Энүнә төлә мөнгн кергтә. Ода эн төр хаһлгдх зөвтә. Январин нег шин күртл энүг правительствд орулж өгх даалһвр бәәнә.

Чучян Валентина, Хавтхна Анатолий