Жанһрин байрт сүл белдвр кегджәнә
Арвн негдгч Жанһрин байрин нәр-наадн күртл нег өдр үлдв. Эндр Элстин ипподромд белдврин сүл көдлмш кегджәнә. Энүнд район болһн эврәннь ишкә герән тосхжана. Иим герт района туужла өөрхн таньлдж болх. Район болһн этнографическ экспонатмуд, туужлгч зургудын стендмуд авч ирв, нааран орсн улсиг хальмг улсин хот-хоолар тоох. Иим ик чинртә нәр-наадыг соньн кеәвр давулхар бүрдәһәчнр зүткжәнә. Байрт ирсн күн болһн этническ сойл болн спортын марһас үзж чадх. Мөрдин урлдан болх һазр хальмгин арнзлмудыг күләжәнә. Эдниг манһдур өрүн эрт нааран авч ирх. Тер саамд һол сценд бииһин специалистнр концертн программан дәкәд нег бүрткж хәләжәнә. байрин йовудт олн-зүсн дуд сонсж болх, ке-сәәхн би үзж болжана. Дәкәд болхла нег минһн нәәмн зун арвн хйордгч жилин дәәнд нерәдгдсн наад бүрдәһәчнр белджәнә. Энүнә төлә шишлнг ке-сәәхн хувцн уйгдв. Шин соньн наадыг һурвн сардан белдж. Тегәд иим наадн олн улст эрк биш таасгдх зөвтә. Тер мет искусствин нертә артистнрла зерг Хальмг танһчин эврә дурар үүлддг хамгин сән гисн коллективмуд шин программ олн улсин оньгт тусхах. Энүнә тускар байрин ах режиисер Борис Манджиев нуувчарн хувалцв.
