Искусствин школын бичкн артистнр концерт үзүлв
Элстин искусствин школын сурһульчнр цутхлнг хурлын дөнгәр соньн концерт белдв. Тер мет бичкн зурачнрин һәәхүл секгдв.
Концертн залд искусствин школын уйн наста артистнр билг-эрдмән үзүләд концерт үзүләд дасчкв. Эдн танһчин марһаст болн фестивальмудт оньдин орлцна. Тегәд чигн олн хәләһәчнр эдниг бүләнәр тосж авв. Нег үлү, сәәхн хальмг хувц өмссн хамгин бичкн көвүд-күүкд һарч ирхлә әмтн икәр байрлв.
Школын директор Лариса Летуеван келсәр, уйн наста билгтнр иим концертд орлцад, билг-эрдмән делгрүлнә. Герл Бадаева Тоһрун шову нертә ду дуулхла, әмтн цуһар тагчг суув. Енгсг-сәәхн дууһарн бичкн күүкн олн улсин зүрк авлв.
Иим концертмуд бичкдүдт дамшлт хоршахд сән нилчән күргнә, хәләһәчнрт болхла йоста байр үүдәнә. Иим керг-үүлдврин нилчәр бичкдүд өвкнриннь уул авяьс-зангшалар болн байн сойлар соньмсна гиж Элст балһсан цутхлнг хурлын администратор Наванг Лодой темдглв. Школын багшнрт болн сурһульчнрт Лодой гелнг белгүд болн күндлһнә һашгуд бәрүлж өгв. Тер тоод иим мөрә Деля Васильева авв. Эн күүкн иим марһанд шунмһаһар орлцна. Деля Васильеван келсәр, Хаврин ду дуулх саната. Эн дуунд хальмгин теегин, бамб цецгин тускар келгджәнә. Эн дууг эцкдән нерәджәнә.
Цаһан Сарин байрт нерәдгдсн байрин концерт белдж давулһнд искусствин бичкдүдин школд Хальмгин цутхлнг хурл Бурхн Багшин Алтн сүм ик дөн болв. Ода школд нәәмн зун билгт сурчана. Школын директор Лариса Летуеван келсәр, бичкдүд иим концертд орлцхдан йир дурта. Нег үлү, цутхлнг хурлын дөнгәр иим концерт болна. Иим керг-үүлдврмүд бичкдүдт оюни сән сурһмж өгнә.
Тер саамд эк-эцкнр, ээж-аавнр бичкдүдин дуулсн дуунд, биилсн биид, домбрин айсд авлгдад, чеежин сергмж авцхав. Бичкдүдин үзүлсн байрин концерт цуг әмтнд таасгдв. Цаһан сарин байр цуг эдниг негдүлв.
Ээнән Ольга, Колдан Церн
