Иргч амрлһна өдрмүдт Әрәсә үвлин цагт орх бәәсмн. Болв эн жиләс авн иим кемд оршго
Иргч амрлһна өдрмүдт Әрәсә үвлин цагт орх бәәсмн. Болв эн жиләс авн иим кемд оршго. Урднь бидн хаврар болн намрар цагиг нег час хооран эс гиж өмәрән кедг биләвидн. Специалистнрин тоолврар, эн кемд әмтн өрүн цаглань серж чадлго, зводг билә, эс гиж нег үлү частан ю кехән меддго бәәсмн. Хальмг танһчин әмтн үвлин цаг уга кесинь яһж тосв.
Хальмг танһчин улсин тоолврар, үвлин цагиг ик кезәнә уурахмн билә. Блиц Эн күүкд күүнә келсәр, зунын цагт невчк дасад бәәввидн, ода өрүн босхд гиигн болв. Эн хойр күүкнә келсәр, өрүн эрт босхдан дурта.
Әрәсән президент түрүн авгтан үвлин болн зунын цагт орлһна олз-тусин тускар алмацв. Иим кевәр жирн орн-нутгин әмтн кесг жилдән бәәжәнә. Мана орн-нутгт болхла цагиг нег част сольдг авьяс түрүн болж нег минһн йисн зун арвн доладгч жилд орв. Эмчнрин тоолврар, зунын цаг нег час өмн бәәхлә, әмтнд тааста болхш. Мана танһчин улсин ик зунь иигж тоолжана. Элст балһсна улсин келсәр, урднь зунын цагт орх кемиг эдн әәмшгтәһәр күләдг бәәсмн. Нег үлү, медәтә улст иим цаг эрүл-мендин халхд му нилчән күргжәв. Баһчуд чигн иим кемд дарунь муурад, зовдг билә. Эмч Любовь Ходжигоровин келсәр, түрүн авгтан күнд болна. Болв хөөннь иим цагт әмтн ижлдәд, эрүл-мендин халхд му үлмәһән күргхш. Элстин поликлиникин эм Любовь Ходжигорован келсәр, нег сар болда әмтн шиг цагт дасч одна. Цусна дарлтын гемтә әмтн тенгрин бәәдл дахна. Зунын-үвлин цагт жил болһн орх керг уга. Зунын цаг әмтнд ирлцжәнә.
Эн баһ наста көвүнә тоолврар болхла, зунын болн үвлин цаг энүнд тас ямаран чигн үлмә күргхш. Эн көвүнә келсәр, зунын цаг үлдхин тускар меднәв. Цаг сольснь нанд медгдхш, цогц-махмуд гем уга гиж эн көвүн келнә.
Специалистнрин тоолврар, өрүн эрт хар сө серсн бийнь, зунын цагт орлһн электрокүч олзлһнд ик хүврлт орулшго. Энергетическ компаня көдләч Аксен Хараевин келсәр, электрокүч әрвлһнә тускар келхлә, һурвн күн бәәх өрк-бүлд иим сольвр зуг тавн арслнг әрвлнә.
Ирх нарн өдр октябрин һучнд компьютермудт цаг нег час хооран кегдх. Юнгад гихлә цуг программ эврән үвлин цаг үзүлх. Тегәд инженермуд цагиг чикәр һаран тәвәд, компьютермудын часиг нег час өмәрән кех зөвтә. Энүнә төлә цаг болн мөнгн бас кергтә болх.
Колдан Наталья, Дукмана Николай
