Алексей Орлов хойр өдрәр Көтчнрә районд көдлмшин кергәр одв
Хальмг танһчин толһач Алексей Орлов хойр өдр Көтчнрә районд көдлмшин кергәр бәәв. Тенд района селәдт одад, социальн чинртә обьеткмудын көдлмш бүрткв, бәәрн улсла харһад күүндв. Хойрдгч өдр Алексей Орлов Көтчнр селәнд көдлмшч олн харһлтс кев. Аштнь танһчин һардач Ергенинский селәнд одв.
Хальмгин толһачла района хамгин шунмһа баһчуд харһад күүндв. Эдн цугтан школан төгсәчкәд, деед сурһульд сурад, зәрмнь ода төрскн һазртан көдлжәнә. Баһ наста специалистнр зуг эврәннь бәәдл-жирһлин тускар санлго, района төлә ухалжана. Тегәд танһчин толһачла болсн харһлтас эдн эврәннь района иргчин тускар медж авх санатаһар ирв. Көтчнрә районд инвсетиционн ик төсв күцәх зуран тускар эдн харһлтын йовудт шинкн сонсв. Мах эд-бод кедг комплекс эдлврт орхла, района бәәдл-жирһл сән талднь сольгдх. шин обьект көдлхлә, талдан чигн олн төрмүд хаһлгдх гиж баһчуд нәәлжәнә. Эднә келсәр, танһчин толһачла харһад күүндсн хөөн, танһчин һардачнр селәнә эдл-ахун делгрлтд ик оньган өгчәхинь медв. Эннь мадниг байрулжана. Юнгад гихлә инвсетиционн төсвс талдан чигн халхар күцәгдх зура бәәнә. Иим предприятьмуд эдлврт орхла көдлмшч эрдмтә специалистнр кергтә болх.
Эннә хөөн хальмг танһчин толһач Алексей Орлов шин комплекс тосхгдх бәәр одад хәләв. Генеральн зураһар нәәмәдлж өггдсн тәвн гектар һазрин аһуд дегц кесг обьект бәргдх. Энд мах эд-бод кедг комбинат болн мал борддг комплекс көдлх. Тер мет талдан продукт эд-бод кедг цех бәрх зура бәәнә. Шин цехин тосхлт хойр сар болад эклхмн. Тегәд Көтнчрә районд темдглсн зура эрк биш күцәгдх гиж Алексей Орлов бат итклтә бәәнә. Көтчнрә района социальн халхд болжах хүврлтс байрлулжана гиж мана программд өгсн интервьюдан танһчин толһач темдглв. Алексей Орловин келсәр, түрүн өдр Шатта болн һашун Бурһстн селәдт газ ирв, ода болхла Көтчнр селәнд газин сурвлжна дөрвдгч девснг татгдв. Тегәд нег жил болад Көтчнрә районд шин промышленн комплекс көдлх.
Дәкәд болхла район хуучн гермүдәс әмтн нүүлһнә федеральн программд орад, энүг сән үзмжтәһәр күцәжәнә. Ода Көтчнр селәнд шин гермүд тосгдхв. Шин бүүрт олн улс ноябрин арвн күртл нүүж орх. Ода шин гермүдт цуг кергтә коммуникац, газ усн орулгдв. Селәнә улс балһсна әмтнлә әдл бәәцин таалта болх. Хальмгин толһачла болсн харһлтсин йовудт селәнә әмтн эдниг үүмүлжәх төрмүд босхв. Эднә зәрмнь бичкдүдин садын тускар келв, талдан улс медицинск дөн күрглһнә төрин тускар келв. Эн күүкд күүнә келсәр, баһ наста өрк-бүлмүдиг бәәдг герәр теткх программар шин гер тосхж авч. Болв эдн газ орулж чаджахш. Юнгад гихлә газин сурвлжн эднә герсә хол зун тәвн метрт бәәнә. газ орулхин төлә мөнгн күртжәхш. Алексей Орловин темдглсәр, иим улст дөн болх кергтә. Шанга халхас нөкд болад, баһ наста өрк-бүлмүдин герт газ орулдх даалһвр өгчәнә.
Района улсин цуг босхсн төрмүдт оньган тусхахан танһчин һардач Алексей Орлов медүлв.
Чучян Валентина, Жамбин Дмитрий
