Заһс бәрлһнә цагт браконьермудла ноолда келһн чанһрна
Заһс бәрлһнә цагт браконьермудла ноолда келһн чанһрна. Мана үүдәгч баг Лаганск районд одад ирв. ФСБ-н заллтин пограничникүд Көк тенгст һарад өдр сө уга гилтә бүртклһ кежәнә.
Марат Усманов Лаганск районд һурвн жилдән церглжәнә. Эн цагин туршарт подполковникин келсәр, бәәрн һазрла ижлдәд, сәәнәр медж авв. Жил болһн заһс бәрлһнә кем эклхлә, эдн өдр-сө уга гилтә тенгст һарад, браконьермудыг бәрж авна. Эн кемд пограничникүд хойр минһн заһсчиг зогсаж, бүрткж хәләнә.
Браконьермудла ноолда кехд пограничникүдт зөв-йсо харлһна органмуд болн заһс харлһна организацсин элчнр нөкд болна. Иим улсла ноолда келһн — эднә хамцу керг болжана. Хальмг танһчар болн Астраханск областяр Әрәсән ФСБ-н пограничн заллтин әнгин ахлач Марат Усмановин келсәр, бидн полицин болн Росрыболовствин көдләчнрлә хамцу бүртклһ кенәвидн. Иим бүртклһнә йовудт зас бәрдг улс зокал эвджәх йовдлиуд илткж хәләжәнәвидн. Бидн межән һазрт көдлнәвидн, Росрыболовствин элчнр эврә көдлмшән кенә, прлицин көдләчнр эврәннь халхин церглт күцәжәнә.
Зуг эн жил тәвн дууна заһс бәрдг гөлм болн тавн минһн заһс бәрдг талдан чигн эв-арһ илткж авгдв, тер мет һучн онһц болн онһцин мотор авгдсмн. Ода эн цуг илткж авсн зөөр пограничн әнгин аһуд бәәнә. Эн өнцһар браконьермуд заһс бәрсн деерән, хойр автомат, гранатомет болн хойр гранат авч йовсн бәәж. Пограничникүдин келсәр, иим йовдл хая-хая учрна. Тер бийнь санамрдх керг уга. Браконьермуд жил болһн зака эвдәд, заһс бәрнә. ФСБ-н то-дигәр эн жилин сүл арвн сарин эргцд мана танһчд арвн хойр күн бәргдв. Эднәс негнь зөв-йосна органмудт көдлжәсмн. Ода энүг көдлмшәсн һарһв. Хальмг танһчар Әрәсән ФСБ-н заллтин көдләчин келсәр, ут-тоодан нег тонн бекр заһс, өрәл тонн берш заһс болн дөчн килограмм хар түрс илткж авсн биләвидн. ФСБ-н орулж өгсн материалар дотр-дундын кергдүдин органмуд зака эвдәд заһс бәрж авв гиж гемшәгдәд, зурһан уголовн керг күцәгдв.
Эндр өдрт бәрж авгдсн арвн хойр күүнәс дөрвн күн зака эвдж заһс бәрв гиж гемшәгджәнә. Удл уга зарһин шиидврәр эдн чанһ засгла харһулгдхмн.
Азыда Надежда, Бадмаран Владислав
