Инвалидмудин байрин өдр Лагань балһснд давв

Инвалидмудин байрин өдр Лагань балһснд давв. Олн эрмдгтә улс цуглрж байр-зовлнган хувалцж, хамдан байр-нәәрән давулв. Кесгнь зөвәр уужм һазрас ирсмн.

Лагань балһснд давсн спортивн керг-үүлдврт танһчин цуг райодас гишнг кесг эрмдгтә улс цуглрв. Ке-сәәхн хальмг бүшмүд өмссн ээжнр, бичкн-бичкн күүкд-көвүд. Эдн эрмдгтә гемтә болвчн цуһар арһ-чидлән һарһад, билг-эрдмән үзүлцхәв. Целинн района Торицкое селәнәс ирсн негдгч багин инвалид Денис Курдюков эврә зурсн сән-сән зургудан авч ирсмн. Бичкн цагтан хойр һаран геесн көвүд эн зурнудан көләрн зурдг болжана.

Лагань балһсна бәәрн күн Чингиз Огультинов бас зургуд зурна.Зуггуд болһнь эврәһәрн соньн. Энүнә зурсн зургудар дамжад, көвүнә эндр өдрә зангинь медж болхмн. зурдг зургуднь онц-онц гиж экнь темдглнә. Кесгнь хар — болн цаһан ширәр зурата. иим кевәр көвүн эндрк бәәдл-жирһлиг үздг болжана. Гемәсн көдтә мана көвүн сурһуль сурч чаджахш, болв итклән гееж бәәхшв гиж Ольга Огультинова һундрхж келнә.

Овата селәнәс ирсн Сюли Кануровна дуулсн енгсг дун олн әмтиг соньмсулж өврүлв. Тавн настадан Сюля Борданева эцкән дәәнд йовулсн болдг. Эцкнь дәәнәс хәрж ирсмн биш. Эн ду нанд мини эгч дасхла гиж һурвдгч багин инвалид Сюля Кануровна келнә.

Эрмдгтә улс дунд зөвәр наста улс чигн йовна. Тер бийнь кесг зууһад километр хаалһ дааһад эдн эн керг-үүлдврт орлцхар ирсмн. Иим харһлт маднд эрк биш кергтә. хоорндан харһад күүндлһн маднд байр өгнә гиж эдн цугтан келцхәнә.

Эрмдгтә улсин байр хувалцхар Москва балһснас Елена Макарова ирсмн. Эн күүкд күн бийнь бас инвалид, 1994-гч жил Лиллихамер балһснд давсн параолимпийск наадна орлцач. Олна организац бүрдәһәд. спонсормуд, олнд дөнг күргдг улс олж авад, инвалидмудт дөнг болгна. Эн ирлһндән эн күүкд күн мана танһчин инвалидмудт белг болн спортивн инвентарь авч ирсмн.

Эндр өдр хальмг танһчд 2З минһн эрмдгтә улс бәәх болжана. Бәәдл-жирһлднь харһдг күнд йовдлмудас эдн әәхш, дангин өмәрән зүткдг улс болжана гиж Цугәрәсән инвалидмудин ниицәнә Хальмг әнгинһардач Василий Мучкаев келнә.

Спортин болн көгжмин байрин әнгәс нань инвалид улс эврә һара кегдлмүдә.н авч ирсмн. Сенр шимтә хот кеһәд чигн эдн дөрлдв. Хот-хоолын марһанд Целинн района элч диилвр бәрв. Байрин йовудт үзүлгдсн Олн-келн әмтнә ке-сәәхн бид хурсн улст бас байр үүдәв. Тегәд эн керг-үүлдвр йоста ик байрт хүвр гиж темдглх кергтә.

Арстана Светлана, Бадмаран Владислав