Элст балһсна көгжмин школ 75-гч жилин өөнән темдглжәнә

Элст балһсна 1гч тойгта көгжмин школ 75гч жилин өөнән темдглжәнә. Эн жилмүдин эргцд һурвн минһн һар көвүд-күүкд энд эдрм дасв. Теднә тоод кесг сойлын ачта көдләчнр, нарт-делкән марһасин дииләчнр.

Эмилия Лиджиева болн Виктория Гушаева көгжмин школур дангин байртаһар ирнә. Эднә тоолврар, эндр сәәнәр эрдм дасхд цуг таал бәәнә. Шидр Эмилия болн Виктория Әәдрхн балһсна камерн оркетрт бөдүн улсла әдл билг-эрдмән үзүлв. Келхд, эдн түрүн болж тиим ик чинртә керг-үүлдврт орлцв.

Виктория Гушаеван келсәр, эн 4 жилин туршарт өргн хуур татна. Эн көгжмин зевснг йир таасгдна. Эмилия Лиджиеван темдглсәр, өргн хуурин ә күүнә ә мет болж сонсгдна.

Эн зургудт Элстин көгжмин школын сурһульчнр орлцата концерт үзжәнәт. Эн зургудыг көвүд-күүкд эврән цокв. Энүг хәләһәд, эврәннь дуту-дундсан илткж болжана. Заалд суусн әмтнд болн жюрин гешүдт бичкдүд орлцата концерт ик гидгәр таасгдв. 75 жилин туршарт эн школын билгтә, дамшлтта багшнр һурвн минһн һар көвүд-күүкдт эрдм дасв. Багшнрин ик зунь нертә көгжмчнр, эднә нердиг зуг мана танһчд биш, талын һазрт чигн меднә.

Эн школ төгсәсн улсин тоод нер туурсн дуучнр, көгжмчнр йовна. Эднә негнь Мерген Настинов. Ода эн хальмгин государственн симфоническ оркестрин дирижер болж көдлжәнә. Көгжмин школын Настинов найн йисдгч жилд төгсәв. Тер цагас кедү жил давсн бийнь, школ тер кевәрн бәәнә. Багшнр чигн ода күртл көдлжәнә. Зуг эндр өдр көгжмин зевсгүд дала болв гиж Мерген Настинов темдглв.

Хальмгин государственн симфоническ оркестрин дирижер Мерген Настиновин келсәр, эднә өрк бүлд күн болһн эн көгжмин школд эрдм дасла. Келхд, көгжмин училишд сурһуль сурчасн кемлә, би нааран дурта школурн ирдг биләв.

Эн школын директор Галина Эняеван келсәр, цуг сурһульчнриг тодлна. Ода эднә икнкнь талдан балһсд цаарандн көгжмин эрдмән өөдлүлнә.

Эняеван келсәр, бичкдүд нааран байртаһар ирнә. Жил ирвәс көвүд-күүкдин билг-эрдм өсәд йовна.

Онц темдглхд, Элст балһсна 1гч тойгта көгжмин школд фортепиано, көгжмин тоерь, оркестрин, келн-улсин болн нань талдан зевсгүд татх эрдм дассн деерән, бичкдүд «хоровое дирижироваиние» болн нертә эрдмиг бас дасж чаджана.

Санкун Кермен, Жамбин Дмитрий