Хальмг Танһчд Алдр Диилврин өдр темдглв

Алдр Диилврин өдрлә Төрскән харсгч дәәнд әмнәсн хаһцсн улсин санлыг тодлхар кесг әмтн ирв. Мөнк заль нертә бумбин өөр сурһульчнр Вахта памяти нерәдлһтә керг-үүлдвр күцәв. Талвнгд дәәнә цагин дуд сонсгдла. Ирсн әмтн ветеранмудт ханлтан өргәд, бүлән үгән нерәдв. Харм төрхд ветеранмудин то жил ирвәс баһад йовна. Эднд онц оньг дангинд тусхагдх зөвтә гиж сангдна, юнгад гихлә дигтә эднә ниилчәр эндр өдр бидн эрүл-менд, көк тенгр дор бәәх улс болжанавидн.

Элст балһсна хотл талвнг зөвтә кевәр кеерүлгдсмн. митингд орлцхар ирсн күн болһна өрч деер георгиевск тасм зүүлһәтә. Алдр диилвр авч ирсн ветеранмудт цугтан йөрәлин үгмүдән нерәджәв. эднә төлә дуд сонсгджав, шүлгүд умшгджав. дигтә эдн эврә әмн-цусарн диилвр авч ирсн болдг.

Мөнк һалын өөр болхла дорас өсч йовх баһчуд харулд зогсч Өвкнриннь санл тодлжав.

Эн зөвәр дааврта керг болжана. мана ах-үйнр мана эндрк сәәхн жирһлин төлә әмән әрвлл уга дәәлдж йовсмн-гиж харулд зогсчасн Элстин олн мергжлттә гимназин 9-гч классин сурһульч Тимур Горяев келнә.

Алдр дәәнә һалд мана танһчас кесг зууһад салдснр орлцсмн. Эднәс долан зун күн әмнәсн хаһцсн болдг. 23 күн Советск Союзин герой гидг күндтә нер зүүсмн. тер һашута дән мана хотл балһсар давад һарсинь бидн меднәвидн. Бичәч Андрей Джимбиев 1942-гч жил элст балһсиг харслһнд орлцсн дәәчин негнь болжана. Зөвәр һашута, күнд жилмүд билә болв бидн хортнас эврә балһсан сулдхад аввдн гиж Андрей манганыкович келнә.

Бас алдр дәәнә ветеран Василий Краснянский дәәнә түрүн өдрәс авн чилтднь йовсн болдг. Улан тугин Дунайск флотилин ханьд йовсн болдг. эн өдр давулгдсн цуг керг-үүлдврмүд ветеранмудт нерәдгдсмн.

Балһна ипподром деер давсн керг-үүлдвр бас Алдр диилврин 67-гч өөнд нерәдгдсмн. Хальмг танһчин толһач алексей Орлов Алдр диилврин орцачнрт йөрәлин үгмүдән нерәдв.

Эн өдр зөвәр темдгтә болсн деерән дааврта гиж.Байрин керг-үүлдврт орлцсн күн болһн темдглв. Мөрнә урлданд ут-тоодан далн күн орлцв. Күн болһн диилвр бәрхәр зүткв. Энүнә йовудт үзүлт-марһан бас давв. Энүнд давсн жилә марһана дииләч Оксана Гермашева дәкнәс диилвр дәрв. Эн диилврән би эврәннь аавдан нерәджәнәв. Мини аав бас диилврин төлә цусан асхж йовсмн гиж күүкн келнә.

Адлр диилврин өдрт нерәдгдсн байр-нәр танһчин цуг райодар, селәдәр давв.

Чүүчән Валентина, Очра Сергей