Ик Царнг селәнд хаалһс шинрүлгджәнә
Ик Царнг селәнд цутхлнг хаалһс шинрүлж ясгдх. Октябрьск района цутхлнг селәнд зуг цутхлнг хаалһст асфальт бәәнә. Эдн ода хуучрад эвдрв. Энүнә ормд шин хаалһ делгх төр ик кезәнәс авн босхгджана. Энүнә төлә селәнә социальн-экономическ делгрлтин танһчин программар мөнгн Хальмгин бюджетас йилһж өггдв.
Көдлмш сентябрин нег шинәс авн эклв. Шебень, шишлнг минральн немлт кесн элсн, битум олзлгджана. Энүг хаалһин тосхачнр хаалһд делгжәнә, энүнә хөөн шишлнг техник хаалһд делгсн асфальтиг тараһад, тегшлжәнә. Ода хаалһин тосхлт Ик Царнг селәнә Чекистснрин уульнцд кегджәнә. Энд ут-тоодан нег дуунад шин хаалһ тосхгдх. Шин хаалһ эвдлрт орхла, Сказка нертә бичкдүдин садт болн негдгч тойгта дундын школд күрч болх. Тер мет района цутхлнг селәнд Советская уульнцд өрәл дуунад шин хаалһ делггдв.
Хаалһин көдләч Сергей Муевин келсәр, эн хаалһин участкд томр бетонн хаалһин плит углж тәвгдв, дорнь асфальтн крошк делггдв, леерәснь халун асфальт тавн сантиметрт делггджәнә. Эн участкт көдлмш төгсхлә, талдан һазрт көдлх.
Ик Царнг селәнд хаалһс шинрүлһнә төлә социальн-экономическ делгрлтин программар мөнгн танһчин бюджетас йилһж өггдв. Ут-тоодан Чекистнрин нертә болн Советская уульнцд хаалһ делгхин төлә дөрвн дундур сай арслнг олзлгдв.
Октябрьск района администрацин толһачин дарук Роман Манджиевин келсәр, поселкд болн районд ода хаалһс дегд му бәәдлд тусв. Ода селәнә цутхлнг хаалһс шинрүлж ясх зура бәәнә. Энүнә хөөн муниципальн хаалһс шинрүлгдх.
Ода Ик Царнг селәнд зуг цутхлнг уульнцд асфальтированн хаалһ шинрүлгдв. Талдан хаалһс ик аца зөөдг машид оньдин йовлһнас көлтә болн хаалһин дор бәәх һазр му болад, хаалһс хуучрад эвдрв. Өөрхн иргчд эдниг ясдг арһ уга болжана. Тер бийнь шин тосхсн хаалһс Ик Царнг селәнә улсиг икәр байрлулад, эднд йоста белг болв.
Елена Алексенко, Хавтхна Анатолий
