Көтчнрә районд олн халхта цутхлнг секгдв

Көтчнрә районд олн халхта цутхлнг байрин бәәдлд секгдв. Иим әнг административн боомтг баһрулһна, государственн болн муниципальн туслмж күрглһнә чинр өөдлүлһнә танһчин шишлнг программар секгдсмн. Районд түрүн иим цутхлнг Комсомольский селнәд сентбярин һурвн шинд секгдсн билә. Ода хойрдгчнь Көтчнр селәнд бәәнә. Элст балһсна цутхлнгд йисн терз үүлджәнә. Мана танһчд кедү иим цутхлнг секгдх, иим көдлмшин ямаран аш диглж болх?

Көтчнрә районд олн халхта цутхлнгин әнг секснә хөөн бәәрн әмтн нег һазрт государственн болн муниципальн туслжм авч болх, тер мет энүнд организацс бас туслмж авч чаджана. Шин цутхлнг нег терзин эв-арһар көдлжәнә. Олн халхта шин цутхлнгд көдлмшин сән таал бүрдәгдв, өдгә цагин некрвлә ирлцәтә шин аппаратмуд болн программн комплексмуд района улст олн халхар кергтә туслмж күргж чадх. Олн халхта шин цутхлнгин көдлмшиг хамгин түрүнд Шин Мер поселкин бәәрн күүкд күн Татьяна Мацакова үнлж чадв.

Шин Мер поселкин күүкд күн Татьяна Мацакован келсәр, нег терзд документан өгхд амр. Эннь района улст йир эвтә болх. Нег үлү, района цутхлнг селәнәс хол бәәх улст эннь йир тааста болжана.

Көтчнрә СМО-н администрац олн халхта цутхлнгд гериг мөнг өглго олзлх шиидвр авч. Энд көдлжәх тавн күн цугтан района бәәрн улс болжана. Ода Хальмг танһчд зәнглһнә ниицән нертә государтвенн программ батлж авгдв. Энүнд государствен болн муниципальн туслмж күрглһнә олн халхта цутхлнгуд секлһнә төлә подпрограмм үүлджәнә. Көтчнр селәнд олх халхта цутхлнг секлһнә байрт танһчин правительствин ахлач Игорь Зотов орлцв.

Танһчин премьер-министр Игорь Зотовин келсәр, ода Көтчнрә район олн-зүсн халхар нүүрт йовна. Энүнә әмтнд иим цутхлнг секх кергтә болв. Района улс ода цаг геелго, ахр болзгт кергтә туслмж авч чадх.

Элст балһснд иим олн халхта цутхлнг эн жилин январь сарас авн экләд көдлжәнә. Эндр өдрт олн халхта цутхлнгд йисн терз бәәнә, энүнд электронн чеерүд үүлджәнә. Танһчин әмтн государственн болн муниципальн жирн йисн туслжм авч чаджана. Шин цутхлнг секснә хөөн энүнд арвн ттавн минһн күн ирәд. кергтә туслмж авсмн. Дундлад нег сардан олн халхта цутхлнгд һурвн минһн күн ирнә. Хойр минһн арвн тавдчг жил күртл танһчин райодын цутхлнг селәдт арвн иим әнг секх зура бәәнә.

Олн халхта цутхлнгин директор Санж Хулхачиевин келсәр, темдглсн зураһар октябрь сард Городовиковск районд иим цутхлнг секгдх, дарук жилд дәкәд зурһан әнг көдлх. Хойр минһн арвн тавдгч жил күртл дәкәд тавн цутхлнг секх зурата. Аштнь мана танһчд олн халхта цутхлнгуд йирн процентд күрх зөвтә.

Райодын олн халхта цутхлнгудын әнгст документ орулж авдг тавн терз көдлх, Элст балһснд ода көдлжәх йисн терз деер деернь арвн хйор терз секх зура бәәнә. Тер мет нег минһнәс даву күн бәәх селәдт государственн болн муниципальн туслмж күргдг әнгс поштын әнгүдт секх зура темдглж авгдв. Ут-тоодан танһчин тәвн селәнд тәвн негн документ орулж авдг терз көдлх зөвтә.

Бевина Мергн, Очра Сергей