Хальмгин деед сурһульд һазадын ордудын баһчуд сурчана
Жил ирвәс Хальмгин университетд сурх оютнрин то өсәд йовна. Эдн олн-зүсн орн-нутгудас ирж сурчана. Эн жил довузовск белдврин факультетин зун сурһульч орс кел дасжана. Нег жилдән орс кел дасссна хөөн, эдн шүүвр өгәд, деед сурһульд орж чаджана. Хальмгин деед сурһульд эдн яһад сурх сана зүүсмн?
Эдн үзг болһниг тодрхаһар келхәр зүткнә. Школд сурчаснла әдл эндсурһульдан һавшун оютнр бәәнә, зәрм көвүд-күүкдт орс кел дасхд күнд болжана гиж багшнр келнә. Эднәс зәрмнь орс үзгүдиг чеежәр келж өгчәнә, ниилврмүдәр үгмүд умшна, бкүл зәнг бас умж чадна.
Тайландас ирсн оютын оср нернь Максим. Эн көвүн һазадын ордудас ирсн баһчудла әдл бийдән орс нер авч. Таасгдсн нер өүүж авлав гиж эн келнә. Зәрм оютнрт багшнрнь нер өгчәнә. Максим болхла зуг долан хонг хооран нааран ирв. Эн цагин эргцд арвн орс үг дасж авч. Урднь гертә орс кел эврән дасхар седж.
Хальмгт хойр жилдән сурчах көвүд-күүкд ода орчулач болж шинкн улст нөкд болжана. Эднә негнь Бенин республикас ирсн Ансельм Хуйиндан. Мана үүдәгч багд шинкн ирсн оютнрла күүндхд дөн күргв. Һазадын ордудас ирсн баһчудын келсәр, обшежитьд бәәцин таал йир сән. Эднә келсәр, у-сарул хораст бәәхд тааста.
Китдәс ирсн Лю Сяо Ин келсәр, орс кел дасхд йир күнд. Тер бийнь дуран өгәд дасжана. Орс кел сәәнәр дасж авхла, бичәчнрин үүдәврмүдиг умшх саната. Ода болхла хот-хол кеһәд, заагтнь орс кел дасжана. Өдгә цагт борш болн орсин билән кедг дасж авч.
Оютин келсәр, билән шархд күнд биш. Китд бас иим хот-хол бәәнә. Өндгнлә холяд тәәвәд тәвх кергтә. Дәкәд күләһәд, шарх кергтә. Йир сән билән болна.
Келхд, Элст балһснд һазадын ордудын оютнр ода күртл иржәнә. Удл уга Шри-Ланка орн-нутгас арвн гелнг ирх зөвтә. Тер мет Монһлас ирх баһчуд бас сурһулян экләд асхмн. Эдн гуманитарн эрдм дасх. Нег жилдән орс кел дассна хөөн, эдн Волгоград балһснд шүүвр өгх. Келхд, ода Әрәсәд зуг арвн йисн деед сурһуль иим шүүвр авч чаджана. Шүүврин ашар негдгч девснгин государственн сертификат авч болх. Эн документар баһчуд Әрәсән деед сурһульд орж чаджана.
Университетин довузовск белдлһнә факультетин декан Любовь Староверкина келсәр, сурһуль төгсәсн баһчуд цаарандан бакалавриатд орад негдгч курст сурч чадх. Ода мана факультет төгсәсн улсас магистратурт бас сурчана. Эдн Әрәсән эрдм-сурһулин министерствин цаасар сурчана. Нег жилдән орс кел дасчкад, университетин сурһульд орж чадх. Зәрмнь бооцаһар сурчана, зәрмнь бюджетн ормд орна. Талдан оютнрла хамдан стипендь авна, номин халхар шинжлт кенә.
Жил ирәвс Хальмгин университетд сурһуль дасх баһчудын то өсәд йовна.Эднә төлә цуг кергтә таал, тер тоод сурһулин, үүдәлтин болн бәәцин сән таал бүрдәгдв. Тегәд нарта-делкән залһлдан батрад, делгрлт авчана гиж келж болх.
Ээнән Ольга, Ирчин Алексей
