Хуучн чонж шинрүлж ясгджана
Сарпинск района Обильное селәнд бәәрн православн чонж шинрүлж ясгджана. Энүг күсдундур зун жил хооран энд тосхсмн. Кесг жилдән эн чонж итклин темдг болж олн улст туслж йовсмн. Оюни зөөрәс нарта-делкәд дәкж үнтә зөөр уга гиж эн православн чонж ил герчлжәнә.
Обильное селәнә Михаило-Архангельск чонжд босхмжин көдлмш йирн доладгч жиләс авн кегджәнә. Хамгин түрүнд чонж йисн метр кермин моднас кегдж. Герин эрсн зәрм ормд һучн сантиметрас авн найн сантиметрт күрчәнә. Энүг төмр хадасар хадсн бәәж. Иим хадасн һучн сантиметрт күрнә. Күсдундур зун жилдән һазрт кевтсн модн чонжин ул болжасмн. Өдгә цаг күртл кевстн модн үрж уга. Эннь дамшлтта тосхачнриг өврүлв. Ода энд өдр болһн дөрвн бәәрн күн көдлжәнә.
Тосхач Сергей Остапченко келсәр, хуучн пол секхлә, энүнә улнь ик чолун деер бәәсн бәәж. Энүг әмтн яһж авсч ирснь алнг болжана.
Ода селәнә чонжиг бәәрн улсин чидләр босхж авчана. Обильное селәнә СМО-н администрацин толһач Геннадий Колгановин келсәр, ода энд пол сольгдв, ода чонжин ора шинрүлж ясгджана. Энүнә хөөн иконостас шинрүлж ясгдх.
Нег минһн найн дөчдгч жилин декабрь сард орсин хан негдгч Николайин зәрлгәр энд селән тогтагдсмн. Энүнд Воронежск, Харьковск, Курск болн Полтавск гебернин крестьянмуд нүүж ирсмн. Селән һазрт шкеол болн чонж бәәхлә селәнә жирлһ унтршго гиж обильненцнр тоолжана.
Обильное селәнә бәәрн күүкд күн Валентина Бердунован келсәр, иим әрүн шүтәг шишлнг чонжин төлә зурсн бәәж. Байн улс иим шүтә шишлнг нег чонжд зурхин төлә даалһвр өгдг билә. Эн шүтән ода күртл хадлһгджана. Энүнд әмтн ирж мөргнә.
Күсдүндур зун жилин эргцд чонжд буудч хадһлдг склад бәәсмн, клуб болж көдлв. Тиигхд советин йосна цагт чонжд бәәсн әрүн шүтәг селәнә улс гертән бултулад хадһлж авч. Ода кесг жилдән әмтнә гермүдт хадһлгджасн шүтән чонжд хәрү тәвгджәнә. Ода ясврин көдлмш кегджәсн кемд энүг хам-хоша бәәх селәнә сойлын герт хадһлжана.
Обильное селәнә Михаило-Архангельск чонжин старост Александра Маковкина келсәр, хойр минһн дөрвдгч жилд алтарь шинрүлж яссн цагт, нег шүтән әмдрв. Эннь Херувим. Энүг талдан шүтәнлә хамдан тәвж. Православн шажнд шүттг улс нааран ирәд мөргнә.
Чонжин тууж нег минһн найн зун жирн зурһадгч жилин июнин дөрвнәс авн эклжәнә. Энүнә тускар Астраханск духовн хүүвин архивмуд герчлжәнә. Эн өдр епархиальн ахлачнр чолун улд Михаил Архангелин модн чонж бәрхин тускар заквр батлж авсмн. Государственн зөөрин Астраханск палатд эн жил батлж авсн документ бәәнә. Тер мет энд чонж бәрх зөвшәл Царицинско-Ставропольск трактын селәдин һардач өгсмн. Эн селәдин ханьд Обильное селән бас оржасмн. Ут-тоодан Астраханск губернин хамльгин һазрт дөрвн Михаило-Архангельск чонж бәәсмн. Эдниг нег янзар тосхж. Ода Хальмг танһчд эн чонж ор һанцхн иим тосхлт болж үлдв.
Элстин болн хальмгин епархин сегләтр Алексей Гришенко келсәр, эн хуучн чонж итклин диилврин ил герч болжана. Әмтнә итклиг булаж авч болшго, энүнд эн кезәнк чонж ил герч болв. Православн улсин итклиг, үнн седклиг булаж авдг арһ уга болжана.
Шинрүлгдсн шин чонжд Обильное селәнә улс түрүн мөргүлиг эн жилин хаврар күцәх саната. Энүнә хонхин ә урдк кевәр хам-хоша бәәх Ростовск областьд күрч сонсгдх зөвтә.
Хавтхна Элла, Хулхачин Николай
