Правительствин президиумин дарани сүүр болв
Хальмг танһчин правительствин президиумин дарани сүүр болв. Энүнд эн жил мана танһчд государственн программ күцәлһнә туст күцәгч йосна органмудын дааврин болн көдлмшин зуран тускар күүндвр кегдв. Предприятин һардачнр государственн программ күцәлһнә төлә күцәгджәх керг-үүлдврмүдин тускар тооца кев. Эн халхар социальн төрмүдт онц оньг тусхагдв.
Шин жилд правительствин президиумин түрүн сүүрт һол оньг социальн төрмүдт тусхагдв. Хальмгин социальн делгрлтин министерствин темдглсәр, бәәдл-жирһлин хамгин баһ кемжәтә орута өрк-бүлмүдин то баһржана, социальн халхар үүлджәх некоммерческ организацсин то өсжәнә, көдлмш олж авсн улсин то зөвәр икдв, талдан чигн күцәмжин тускар күүндвр болв. Тер бийнь эн туст хаһлх төрмүд ода чигн дала.
Танһчин социальн делгрлтин, күч-көлснә болн улсиг көдлмшәр тетклһнә министр Марина Ользятиеван келсәр, социальн халхар дөн күрглһнә цагт иим дөн күләжәх шишлнг улст нөкд болх күцл тәвгджәнә. Ода Сарпинск районд бәәх диспансерт немр хора бәрх төр тәвгджәнә. Ода энд бәәх хот кедг хора хуучрад, энүг ясх төр босжана.
Эрдм-сурһулин халхар государственн программ күцәлһнә тускар келхлә, хойр минһн арвн дөрвдгч жилд танһчин арвн негн районд бичкдүдин садт орх чеерүд уга кегдх. Давсн жилин ашар Хальмгт дошкольн учрежденьд хойр дундур минһн немр орм бичкдүдин төлә секгдв. Ода дәкәд дөрвн шин бичкдүдин сад тосхгджана.
Танһчин эрдм-сурһулин болн номин министр Лариса Васильеван келсәр, Элст балһснд хойр обьект тосхгдхмн. Тер мет хойр обьект Троицкое селәнд бәргдх. танһчин арйодт арвн обьект бәрх зура бәәнә. Иим райодт бичкдүдин садмудт чеерүд бәәнә.
Сойлын делгрлтин төрмүдт олна оньг тусхалһна төлә, сойлын болн туужин зөөр хадһлһна төлә Әрәсән Президентин зәрлгәр эн жил сойлын жил гиж зарлгдв. Эн халхар Хальмг танһчд государсвтенн программ күцәлһнә һол төр болж государственн муниципальн учрежденьсин материальн-техническ ул батрулһна туск төрмүд хаһлгдх. Тер мет селәдин сойлын гермүд шинрүлж яслһна төр тәвгджәнә.
Хальмгин сойлын министр Амулнг Учурован келсәр, сойлын министерств күцәх керг-үүлдврмүдин зура темдглж авсмн. Эн туст бюджетн мөнг олзлһна төр хамгин һол төр болж хаһлгдх.
Хальмг танһчин правительствин президиумин түрүн сүүрт танһчин министрмүдин кабинетин гешүд батлж авсн бюджетас иштә государственн программ күцәлһнә төрмүд темдглж авв. Күцәгч йосна региональн органмудын үүлдвр сүл цагт ясрсн бийнь премьер-министр Игорь Зотов иим программ күцәлһиг министрмүд эврән бүрткж даавр зүүх зөвтә.
Бевина Мергн, Котина Валерий
