Халун хотар сурһульчнриг яһж теткжәнә?
Школд сурһульчнриг халун хот-хоолар теткхлә, эднә эрүл-менднь сән болх, сурһулян чигн эдн сәәнәр дасх. Школд сурчах цуг бичкдүдиг халун хотар тетклһнә төр тәвгджәнә. Эн туст хот-хоолын чинрнь сән болх зөвтә.
Столовас һарчах хот-хоолын үнр школьн коридормудар һарна. Сурһульчнрт ши, махна котлет, зер-земшин компот болн әмтәхн булочк өгнә. Кичләмүдин хөөн нәәмдгч класссин сурһуль Константин Орулов хот уухар нааран адһна.
Элстин арвдгч школын сурһульч Констнатин Оруловин келсәр, халун хот авна, булочк таасгдна. Столовд оньдин цевр-цер. Энд сууһад хот уухд тааста болна.
Ода школд халунар хотар бичкдүдин йирн тавн процентнь теткгджәнә. Өдр болһн тавн зун һучн һурвн сурһульч өрүн болн үдин хот энд ууна. Бичкдүдт өгдг хот-хоолын чинрт школд ик оньг өгчәнә. Өдгә цагт Роспотребнадзорин то-дигәр мана танһчд халун хотар сурһульчнрин жирн хойр процентнь теткгджәнә. Эн давсн сурһулин жиллә дүнцүлхлә невчк ик болжана. Элстин арвдгч школла әдл хот-хоолар теткгдг сән бәәдл талдан сурһулин заведеньст бүрдәгдсн уга. Сурһулин заведеньсиг Роспотребнадзорин специалистнр бүрткснә хөөн, халун хотар бичкдүдиг тетклһнд дуту-дундс бәәнә. Сурһулин шин жилин түрүн хойр сард иим бүртклһнә далн процент зака эвдсн йовдл илткгдв. Жирн дөрвн школын тускар протокол бичгдв.
Роспотребнадзорин заллтин ах специалист Светлана Конушеван келсәр, ода сурһульчнрин далн процентнь халун хотар теткгджәнә. Болв хот-хоолар теклһн сән бүрдәмжтәһәр кегджәхш.
Үлгүрнь, Ик-Буурла района школд иим йовдл учрв. Эн жилин октябрь сард эн сурһулин заведеньд сотолов хот уусна хөөн дөчн дөрвн икүн хордв. Энүнд халун хот-хоолар тетклһнә көдлмш мууһар бүрдәгдж. Кергтә некврлә ирлцжәхш. Энүнд худгас усн өггджәхш, оборудовань уһадг кергтә техническ инвентарь уга бәәж. Бузр ус һарһдг оборудовань кегдж уга. Роспотребнадзор школын директори энүнә дарукиг, медсестраг болн повариг санитарн эпидемиологическ неквр эс күцәсн төләд административн засгла харһулв. Эн йовдлар уголовн керг күцәгджәнә. Энүг района прокуратур бүртклһнд авв. Сурһульчнрин эк-эцкнр школод хот-хоолар мууһар теткжәхин тускар келнә.
Энүнә келсәр, школд хот-хоолын чинрнь сән болх зөвтә. Зер-земш өгхш. Такан мах өгнә. Эн сурһульчин келсәр, шишлнг организац школьн столовиг сәәнәр бүрткж хәләх зөвтә.
Танһчин школмудт өрүн болн үдин хот зурһан арслнгас авн дөчн арслнгд күрчәнә. Иим мөнгәр сурһульчнриг сән чинртә хотар теткж болхий аль угай? Нег үлү, хот-хоолын үн өсәд йовна. Школд хот-хоолар льготн категорин бичкдүд бас теткгджәнә. Мана танһчд иим долан дундур минһн бичкдүд бәәнә. Эдн баһ тетквртә болн жирһлин күнд бәәдлд туссн өрк-бүлмүдин күүкд. Эднә төлә района эс гиж балһсна администрац нег күүнд сардан тавн зун арслнг йилһж өгчәнә.
Галина Сарангован келсәр, школд ода эклц классмудын цуг сурһучльнр халун хотар текгджәнә.Федеарльн кемжәһәр нег дәкж хот өгднь баһ. Сурһульчнр үдин хөөн бас школдан бәәнә. Гемтә бичкдүд школын хот идж чадшго. Ода деерән йирн процентнь хотар теткгджәнә.
Ода мана танһчд сурһульчнриг халун хотар тетклһнд хаһлх төрмүд дала. Эн халхд мөнг эс күртсн деерән, школьн столовд көдлжәх улс санитарн кемжә күцәх зөвтә.
Елена Алексенко, Котина Валерий
