Хальмгин спортсмен Европин чемпионатд орлцх

Самарск областьд ветеранмуд дунд болсн чемпионатд, мана танһчин спортмен Александр Дамбинов диилвр бәрәд, Архангельск балһснд болх Европин чемпионатд орлцх зөв авв. Ода эн медәт 75 наста. Тер бийнь эндр өдр күртл спортар соньсчана.

Эн зургудт Архангельск балһснд болх чемпионатд сүл белдвр үзжәнәт. Келхд, эн марһанд орлцхин төлә Александр Дамбинов сән аш үзүләд, Европин чемпионатд орлцх зөв авв. Александр Алексеевичин келсәр, 50 жилин эргцдт эн спортд бийән тусхаһад сән дамшлт хоршав. Эн цагин туршарт олн-зүсн маарһаст орлцад, ачлврта болсмн.

Александр Дамбиновин келсәр, энүнлә хамдан дамшлтта спортсменмүд орлцв. Маарһанд орлцхларн сән үзмж бәрж, диивр бәрх төр өмнән тәвнәв.

Урднь Дамбинов фельдшер болж көдлж йовсн күн. Тегәд чигн эрүл-менд спорт сән нилч күрдгинь меднә. Бичкн цагтан уульцт кесг төмр цуглулад, өргәд, цогц-махмудан батрулдг билә. Хөөнь секцд орв. Тер цагт кесг әмтн футбол наадла, эс гиж би биилдг кружокмудт цаган давулла. Александр олн-зүсн марһаст орлцад, кесг дәкж призер болж һарв. Дамбиновин тоолврар, күнд атлетик зуг залу улсин спорт.

Александр Дамбиновин келсәр, эн спортар соньмсчах улс чанһ-чиирг болсн деерән, ухата болх зөвтә. Юнгад гихлә, дөрлдәнә өмн күн болһн бийән батрулх зөвтә.

Нарт-делкән кесг дам чемпион Игорь Настиновин тодлсар, Александр Алексеевич энүнә тренер билә. Ода болхла Игорь Александр Дамбиновиг маарһанд белджәнә. Цуг хоршасн дамшлтан, эврәннь методикан олзлад, дөрлдх саната. Ода Александр Алексеевич далн тавта. Тер бийнь урдк цаг мет чидлтә.

Нарт-делкән чемпион Игорь Настыновин келсәр, дорас өся йовх баһчуд эрк биш Александр Дамбиновас үлгүр авх зөвтә.

Архангельск балһснд болх чемпионатд әрәсән йилһән сән спортсменмүд орлцх, эднә тоод Александр Алексеевич. Эн маарһанд Дамбинов диилвр бәрхәр зүткжәнә.

Ээнән Дельгр, Котина Валерий