Хальмгин боксермуд Әәдрхнд нәәмн алтн медаль шүүж авв

Хальмгин боксермуд нәәмн алтн медаль шүүж авв. Уйн наста танһчин спортсменмүд Әәдрхн балһснд болсн боксин секәтә марһанд ончрв. Энүнд Ростовск областин, Дагестана болн Казахстана элчнр ирж дөрлдв. Эндр өдрәс авн спортын школын сурһульчнр дарани дөрлдәнд белдвр экләд кежәнә.

Боксин секәтә марһанд Ростовск областин, Дагестана Казахстана болн талдан чигн регионмудын элчнр ирж дииләчән йилһв. Хальмг танһчас арвн негн — арвн дөрвн наста спортсменмүд дөрлдв. Ут-тоодан хөрн долан күн танһчин нер харсв. Зүткәтә дөрлдәнә ашт хальмгин уйн наста спортсменмүд нәәмн алтн, тавн цаһан мөнгн болн нәәмн күрл мөнгн медальмуд шүүж авч чадв. Тер тоод Элст балһсна боксер Алдр Обгушев түрүн орм эзлв. Юность России нертә боксин марһана дииләч Алдр Обгушевин келсәр, хамгин түрүн ноолдан күнд болв. Юнгад гихлә, үүмәтә бәәж, сән белдвр кех кергтә бәәсмн. Цаарандан невчк төвкнәд, сәәнәр ноолдв. Хамгин сәәнәр товчлгч харһлт болв. Тенд бас түрүн авгтан невчк үүмх саам учрв. Тер бийнь диилвр бәрж чадв.

Эн жилин хаврар Әрәсән Өмн үзгин боксин марһан болх. Ода көвүд энүнд тохнята белдвр кежәнә. Эндр болсн марһана ашар Хальмг танһчин хамцу команд бүрдәгдх. Юность России марһана дииләчнр болн призермудын тоод иим спортар шинкн экләд көдлжәх болн дамшлтта спортсменмүд бәәнә. Церн Балзановин нертә боксин школын багш Олег Кеквеевин темдглсәр, март сард дәкәд нег марһанд сән спортсменмүдиг йовулх зура бәәнә. Иим дөрлдәнд көвүд цуг хоршасн дамшлтан, занган, диилвр бәрх күцлән медүлнә.

Оданас авн уйн наста боксермуд иргч дөрлдәнд белдвр кежәнә. Харм төрхд, киитн болад, зәрм баһ наста спортсменмүд царцад гемтжәнә. Тегәд хувцан дулалх кергтә гиж тренермуднь селвг өгчәнә.

Тренер Олег Кеквеевин келсәр, давсн дөрлдәнд хальмгин боксермуд сән үзмж бәрж чадв. Тер бийнь ода харһсн эндүһән чиклж авх кергтә. Иргчдән эдн ик чинртә марһаст орлцх зурата бәәнә.

Бевина Мергн, Хулхачин Николай