21-гч тойгта школ цугәрәсән марһанд диилвр бәрв

Элстин школмуд Әрәсән сән эрдм-сурһулин заведеньсин тоод орна. 21-гч тойгта школ цугәрәсән зоачн марһанд диилвр бәрв. Кермн Башнаеван сурһульчнр эн сард дәкәд нег цугәрәсән марһанд хальмг танһчин нер харсх зөв авв.

Кермн Башнаева эклц классин багш болж хөрн тавн жилдән көдлжәнә. Энүнәс хөрн жилдән Занковин системар үүлджәнә. Иим сурһулин эв-арһ бичкдүдиг эврән ухалхинь дасхна, жирһлин ямаран чигн бәәдләс һархд туслна. Хөрдгч школын багш Кермн Башнаеван келсәр, Занковин систем бичкдүдт туслна, иим сурһульчнр хоорндан хәрлцә сәәнәр тогтана. Ямаран чигн коллективд бәәж чадх.

Занковин программар сурчах көвүд-күүкдин цугәрәсән региональн девснгд энүнә сурһульчнр түрүн орм эзлв. удл уга эдн Москва балһснд болх дөрлдәнд Хальмг танһчин нер харсхмн. Элст балһсна хөрн негдгч школ болхла, школьн сурһмжин системар болсн цугәрәсән заочн дөрлдәнд бас диилвр бәрж. Географин предметар болсн соньн марһана йовудт арвдгч классин сурһульчнр предметар авсн медрл үзүлсн деерән, экологин халхар ухан тоолврарн хувалцж чадв. Тер мет көгжмин, литературин туст эрдмәрн ончрв, төрскн һазрин тууж, сойл болн кел меддгән үзүлв. Элст балһсна мэрийн эрдм-сурһулин заллтин методист Лариса Хасигован келсәр, көвүд-күүкд сурһулян арднь орж дасжана. Эднд медрл авхд соньн болжана. Тегәд чигн иим сурһулин аш сән болв.

Элст балһсна хөрн негдгч школд болсн иим өвәрц кичәлмүд оньдин бүрдәгднә. Үлгүрнь, эн школд бичкдүдин эрүл-мендин халхд онц оньг тусхагджана. Физкультурин кичәлмүд дорас өсж йовх баһчудт ик олз-туста болна, нег үлү, эднд көгжм, биологин предмет таасгджана. Дәкәд болхла эдн өрәл өдр гилтә хамдан бәәһәд, хоорндан бүләнәр хәрлцнә.

Хөрн негдгч школын физкультурин багш Евгений Ходеевин келсәр, сурһульчнр физкультурин кичәлд йир дурта. Иим кичәлмүдин хөөн эрүл-менд батрулһна багмудын то баһрв.

Сурһуль болн сурһмж нег систем болхин тускар школын директор Тамара Сим орулж өгсн селвгин һол зөрүлт болв. Сүл жилмүдт Әрәсән эрдм-сурһуль эн халхар эндү һарһад бәәв. Хөрн негдгч школын директор Тамара Сим келсәр, сурһуль болн сурһмж хойриг хамднь дассх кергтә. Сурһульчнриг зуг иим кевәр школд сурһхла сән болх гиж директор тоолжана.

Школд багшнр бүкл өдртән гилтә сурһульчнрла көдлнә. Тегәд чигн иим үүлдврин аш сән болна.

Хавтхна Элла, Колдан Церн