Хальмг келнә багшнр дамшлтарн хувалцв

Эклц келн-улсин классмудт кел өргжүллһнә кичәл яһж давулхин тускар хальмг келнә багшнр хоорндан селвцв. Эдн Элст балһснд дамшлтын болсн семинарт харһв. Энүнә йовудт багшнр эврәннь көдлмштән олзлгджах шин эв-арһ бас үзүлв.

Арвн нәәмн жилдән школд көдлжәх Эльзята Бадмаева һурвдгч класст секәтә кичәл өгчәнә. Энүнд танһчин школмудын багшнр орлцжана. Багш зөвәр үүмж кичәлән давулжана. Болв хөөннь үүмдгән уурад, хальмг кел дасхлһна шин методикар сурһуль дасхжана.

Өдгә цагт мана танһчд эрдм-сурһулин халх шинрүлһнә көдлмш гүргүдән. хальмгин эрдм-сурһулин, сойлын болн номин министерствин элч Надежда Михайлован келсәр, шин методическ дөнцл материал болн хальмг келнә учебникүд цаарандан чигн барлгдх.

Семинарин йовудт төрскн кел эклц классмудт дасхлһна шинрүлгдсн программар шин методиечск эв-арһ олзлһна тускар багшнр күүндв. Арвн хойрдгч тойгта школын багшнр давулсн ил кичәлмүдин хөөн, танһчин цуг райодас ирсн далн һурвн багш номин болн дамшлтын семинарт Төрскн келн нертә танһчин хүүвин сүүр давулв. Тер мет эдн шишлнг анкетин суврмудт хәрү өгч. Эднә күцәжәх амр бюиш көдлмшин күцәмжнь ил. Ода бичкн көвүд-күүкд төрскн келәрн хоорндан күүнднә, хальмг келәр соньмсжана. Школмудт олзлгджах шин методик болн эрдм-сурһулин шинрлт төрскн кел даслһнд сән нилчән күргжәнә. Болв школмудт болн өрк-бүлмүдт әмтн хоорндан хальмг келәр баһар күүнджәнә. Эннь хамгин хурц төр гиж семинарт орлцсн багшнр темдглв.

Татьяна Дмитриева, Хулхачин Николай