Балакан Алексейин өөнд нерәдсн байр цаарандан болжана

Эндр Балакан Алексейин нер зүүжәх балһсна библиотект бичәчин найн тавн жилин өөнд нерәдгдсн асхн болв. Энүнд бичәчиг сәәнәр медж йовсн улс, шүлгчнр, бичәчнр болн театральн үүлдәчнр орлцад, тодлврмударн хувалцв.

Санлын асхнд шүлгчнр, бичәчнр, театральн үүлдәчнр цуглрад, тодлврмударн хувалцв. Эдн Балакан Алексейиг сәәнәр таньж йовсмн. Артистк Алевтина Кекееван тоолврар, Балакан Алексейин бичсн нааднд орлцад, һол дүрмүд наадад, тоомсрта болв. Өдгә цагт келн-улсин театр энүнә үүдәсн пьесмуд тәвжәнә. Алевтина Убушаевнан келсәр, гүн ухан-саната үүдәврмүдт му-сән йовдлын тускар, дурна тускар келгджәнә. Иим наадд олна зүркнд мөнкинд үлдх. Алевтина Кекеева ода күртл Правительствен даалһвр нертә нааднд Рано күүкнә дүр наадсан йир сәәнәр тодлна. Эннь Ока Городовиоквин туск түрүн театральн наадн болв. Энүнд арлдр дәәчин хүвслһнә цагин туск йовдлмуд үзүлгдв. Урднь энүнә тускар олн әмтн меддго бәәсмн.

Хальмг танһчин ачта артистк Алевтина Кекееван келсәр, өлсәд-харнжасн балһснд өндр уул дамжад хот-хол авч ирх даалһвр Ока Иванович Городовиковд өгч. Эн наадыг хәләхәр оньдин Баснг Городовиокв ирдг билә. Нег дәкж наадн төгссн хөөн, Баснг Бадьминович сцен деер һарад, Сасыковин әәм деер һаран тәвчкәд, менд аав гиж келв. Эннь туужлгч йовдл болв.

Балакан Алексейин билг-эрдм олн-зүсн халхта. Бичәчин ончта өөнд нерәдгдсн харһлтын йовудт шүлгч Балакан Алексейин бичсн дуд эрк биш тодлх. Тер тоод Элстин вальс олн улст хамгин удрта болн тааста дун болжана.

Балакан Алексейин тодлсар, Элст балһсна тускар ду бичх сана энүнд танһчин нертә композитор Петр Чонкушов орулж. Удан боллго, манһдуртнь дууна үгмүд белн болв. Шүлгләнә болн көгжмин билг харһад, Бурхна евәләр иим дун үүдәгдв. Кесг жилмүдин туршарт эн дун Хальмг танһчин хотл балһсна частр гиж тоолгджана. Балакан Алексейин нертә библиотекин һардач Татьяна Бадминован келсәр, у-өргн теегт торһан дун күүнә седкл авлж, күн болһна чееж сергәнә.Эн жил эн дун тәвн тавн жилин өөн темдглх.

Найн тавн жилин ончта өөнд нерәдгдсн харһлтын йовудт Балакан Алексейин бичсн шүлгүдин тускар онц келгдх. Шүлгләнд дурта улсин келсәр, шүлгч эдниг нег әмсхләр үүдәж.

Бичәчин бичсн түүкмүдт болхла эгл улсин бәәдл-жирһлин тускар тодрхаһар келгднә. Библиотекарь Лариса Василенко келсәр, Балакан Алексейин үүдәврмүд гүн ухан чинртә, эгл амр келәр бичгдв. Энүг бичкдүд болн бөдүн улс әдл дурлж умшна.

Алексей Гучиновичин өөрхн улсин болн элгн-саднаннь тодлсар, бичәч оньдин цаһан сана зүүж, цуг керг эрк биш күцх гиж нәәлдг бәәсмн. Бичәчин дурта көдлмшнь энүнд ик урмд өгәд, дөн-түшг болж йовсмн.

Чучян Валентина, Котина Валерий