Элстин төрлһнә герт тәвн сай арслнга шин медицинск оборудовань ирв
Хальмг танһчин перинатальн цутхлнгд тәвн сай арслнга шин медицинск оборудовань ирв. Тер тоод кегдмл эв-арһар ки өгдг аппарат, электрофорез, операционн ширә, ультразвукин эхоэнцефалограф, электрокардиографы болн нань чигн оборудовань хулдж авгдв. Ода нилх бичкдүдиг болн эднә экнриг күцц шинжлж хәләж болх. Эмчнрин тоолврар, шин аппаратмуд нилх хорлһна то баһрулх.
Элст балһсна перинатальн цутхлнгд ирсн өдгә цагин некврлә ирлцәтә шин оборудовань, тер тоод электрофорез, операционн ширә, ультразвукин эхоэнцефалограф, электрокардиографы болн нань чигн оборудованя ик зунь ода углж тәвгдв. Энүнә төлә федеральн бюджетас һучн нәәмн сай арслнг йилһж өггдв, дәкәд болхла энүнә төлә коммерческ компаньсин буйнч седклин дөн гиһәд арвн хойр дундур сай арслнг йилһж өгв. Шунгаеван нертә Элст балһсна төрлһнә ах эмч Тамара Ермошкаеван келсәр, родовой сертификат нертә программ бәәнә. Эн төсв зурһан жилдән үүлджәнә. Иим программин мөнгәр, урднь оборудовань хулдж авгдла, болв иим олн аппарат хулдж авгдад уга билә. Сүл зурһан-долан жилд ут-тоодан һучн долан сай арслнг йилһж өггдв. Ода болхла нег жилин туршарт тәвн сай арслнг ирв.
Тер мет шин оборудовань нилхдүдиг эмнүлдг реанимацин әнгд бас углж тәвгджәнә. Ода эмчнрин келсәр, тәвн зун грамм чивхтә нилхдүдиг иим оборудованьд бәрәд, өскж болх.
Ах эмч Тамара Ермошкаеван келсәр, Элст балһсна төрлһнә герин һол корпуснь удл уга шинрүлсн хөөн экләд көдлх. Иргч долан хонгт у-сарул, дулан палатмуд, эмнлһ авдг кабинетмудт болн талдан чигн хораст саата күүкд улс орж чадх.
Элстин төрлһнә герин ах эмч Тамара Ермошкаеван келсәр, шинрүлгдсн герт саата жирн күүкд улс эмнүлгдж чадх. Тер мет лабораторь бәәнә, хөннь тенд перинатальн цутхлнг көдлх. Түрүн давхрт клинико-диагностическ әнг эс гиж цәәлһвр өгдг поликлиник секгдх.
Онц келхд, хотл балһсна төрлһнә герин талдан корпуст капитальн ясвр эн жилин хаврар эклхмн. Дәкәд болхла, иим капитальн ясвр болн медицинск учрежденьсиг шин оборудованя тетклһн танһчин райодт бас күцәгдхмн.
Бевина Мергн, Хулхачин Николай
