Дамшлтта юристнр әмтнд цәәлһвр өнгәр өгчәнә

Хальмгин олн-әмтнә хуралын депутатнр өнгәр юридическ дөн күрглһнә туск закаг түрүн умшлһнд хәләсн билә. Иим седвәртәһәр прокуратурин элчнр депутатнрт эрлһ бичсмн. Иим седвәр бас учрта, юнгад гихлә, өдгә цагт олн әмтн зөв-йосна халхар сән медрл уга. Тегәд эднд дөн күргх кергтә. Иим цәәлһвр эднд дамшлтта юристнр өгч чадхмн.

Иим юридическ цәәлһвр социальн харслһн кергтә күн болһн өнгәр авч чадх. Тер тоод жилишн, күч-көлснә, өрк-бүлмүдин, социальн тетклһнә болн талдан чигн төрмүдәр тодрха цәәлһвр авх арһ бәәнә. Онц келхд, сүл цагт Элст балһсна бәәрн әмтн болн танһчин улс иим төрмүдлә оньдин харһна, тегәд иим сән керг эднд таасгджана.

Келхд, иим дөн авхар седсн әмтн цуһар юридическ нөкд авч чадх. Эн утст эднд амн үгин цәәлһвр өггдх, кергтә болхла цуг документ белдгдх. Болв арһлачин үүлдврәс нань талдан чигн төрмүдәр олн әмтн кергтә дөн авч чаджана. Онц темдглхд, иим зөв олн үртә, талдан чигн социальн халхар күнд бәәдлд туссн әмтн, инвалидмуд, көдлмш уга пенсиоснермуд болн эднә өрк-бүлин гешүд, арвн нәәмн нас күрәд уга ВИЧ гемәр гемтсн улс болн нань чигн категорин улс тер тоод йовна. Хальмг танһчин прокурорин ах нөкд саглр Манжикован келсәр, иим закан йир кергтә. Хальмг танһчд иим седвәр хамгин түрүн болж Әрәсәд орулж өггдәд, эн керг делгрлт авчана. Ода энүнд дамшлтта адвокатмуд болн талдан чигн юристнр орлцх.

Давсн жилд чигн зөв-йос харлһна төрмүдәр адвокатмудла иим көдлмш бас кегдсн билә. Нидн жилин июль сарас авн юристнрин ниицәнә специалистнр Элст балһсна улсла иим көдлмш нег сард хойр дәкж бүрдәдг бәәсмн.

Санкун Кермн, Колдан Церн