Элстин педагогическ колледжд дундын школмудын уйн наста көвүд-күүкд дунд гирь өрглһнә марһан болв
Һарцин чилгчәр спортын туск зәнг. Элстин педагогическ колледжд дундын школмудын уйн наста көвүд-күүкд дунд гирь өрглһнә марһан болв. Көвүд гирь өрглһнә хойр дасхлар дииләчән йилһв. Эдн арвн дөрвн болн арвн зурһан килограмм чиннүртә гирәс негинь шүүж авад, өргх зөвтә билә. Көвүд тәвн һурвн, жирн һурвн, далн һурвн болн далн һурвн килограммас үлү чиннүрин категорьт дөрлдв. Күүкд болхла нәәмн эс гиж арвн зурһан килограмм чиннүртә гирь өргв. Эдн һурвн чиннүрин категорьт дииләчән йилһв.
Арвн долан наста Анастасия Манаева гирь өрглһнә спорт шүүж авсндан алмацсн уга. Ода кесг цагтан дамшлт хоршасн хөөн, арвн дөрвн килограмм гириг амрар өрдг болв. Түрүн хәләцд иим спорт күүкд күүнд ирлцжәхш. Тер бийнь иим спор күүкнд таасгджана. Тер мет билгтә күүкн талдан чигн спортар соньмсжана. Гирь өрглһнә спортар хойр жил хооран соньмсдг болв, гиигн атлетикар болхла ик кезәнәс авн соньмдсг болв. СНХ Анастасия Манаеван келсәр, иим дөрлдәнд орлцад, чидлән сөрхлә, сән болна. Диилвр бәрх урмд өгнә. Нег үлү, талдан чидлтх спортсменмүдлх дөрлдхд сонбн болна.
Хальмг танһчин гирин спортын федерацин һардач Баснг Эдеевин келсәр, эн спорт көвүд болн күүкд әдл кевәр туслна. Энүнә тоолврар, гирь өрглһнә спорт нурһна бульчнг чанһахд сән нилчән күргнә. Болв күүкд иим спортас невчк әәнә. Бульчнг болн цогц-махмуд дегд ик болх гиж күүкд тоолжана.
Гирин спортын федерацин ахлач Баснг Эдеевин келсәр, эннь хаһжр тоолвр. Гирь өргдг спортсменмүд теслттә болна. Гиигн атлетикла, лыжин спортла әдл теслт өгнә. Ик бульчнг махмудта күн гирь олн дәкж өргж чадшго.
Кристина Тавлеева болхла гирин спортын мастер болсн деерән, ода көвүд-күүкдт эврәннь дашлтан өгчәнә. СНХ Кристина Тавлееван келсәр, гирин спортар хойр дундур жилдән көдлжәнәв. Мана тренер Баснг Эдеев. Олн-зүсн марһанд орлцад, призермудын тоод орлцв. Иим спорт сән дөн болна. Күүкдт түрүн авгтан күнд болна. Ода болхла эврәннь сурһульчнран марһанд авч ирләв гиж Кристина келнә.
Марһанд Элст балһсна школмудын арвн команд дииләчән йилһв. Энүнд ут-тоодан арвн дөрвн — арвн долан наста жирн көвүд-күүкд орлцв. Тер тоод һурвн күүкн өгсн даалһвриг йир сәәнәр күцәж чадв. Анастасия Манаева нәәмн килограммгириг аврн минутын эргцд зун найн зурһа дәкж өргв. Эдеевин тоолврар, им күцәжм бәрсн күүкн цугәрәсән марһанд чигн орлцж чадхмн. Көвүд хойр дасхл үзүлж дөрлдв. Командн дөрлдәнә ашт Элст балһсна олн халхта гимназин уйн наста спортсменмүд Кристина Тавлееван сурһульчнр түрүн орм эзләд, кубокар ачлгдв. Хойрдгч орм Элстин хойрдгч тойгта школын команд эзлв. Һурвдгч ормд Элстин техническ лицейин спортсменмүд һарв. Онц марһанд Элстин олн халхта гимназин сурһульч Адьян Убушиев далн һурвн килограммин чиннүрт диилвр бәрв. Эн көвүн арвн минутын эргцд арвн зурһан килограмм чиннүртә гириг зун һучн нәәм дәкж өргв. Баснг Эдеевин келсәр, марһанд орцлсн цуг көвүд-күүкд сән күцәмж бәрв. Удл уга иим дөрлдәнд оютнр диилчән йилһхмн. Эднә дөрлдән декабрин арвнд болх.
