Элст балһсна арвн хойрдгч тойгта школд Жанһрин ачнр нертә танһчин фольклорн-этнографическ марһан болв
Тадн танһчин зәнг шуд эфирт хәләжәнәт. Һарцан цаарандан өгчәнәвидн. Элст балһсна арвн хойрдгч тойгта школд Жанһрин ачнр нертә танһчин фольклорн-этнографическ марһана балһсна девснг болв. Энүнд арвн тавн школын зурһадгч — йисдгч классмудын орлцв. Далн көвүд-күүкд дөрвн секцд — Уйн наста келмчнр, Эрудит, Жанһрин шинжләчнр нертә секцд марһв. Энүнә хөөн сурһульчнр жюрин гешүдт болн олн хәләһәчнрт театрализованн наад үзүлв. Иим наад марһана программар үзүлх кергтә бәәсмн. Билгтә бичкн жанһрчнрин тускар мана сюжетд келгджәнә.
Намжл Болдырев эн марһанд хөрдгч тойгта школын нер харсжана. Багшнрин келсәр, жанһр шинкн экләд дуулжана. Тер бийнь билгтә көвүн йоста эрдмч болх ицл бәәнә. Намжлын тоолврар, хоолан шахад дуулдг эрдм дасхин төлә, кесг билг кергтә. Тер тоод көгжм сәәнәр сонсад шингәж авх, домбр цокдг дасх болн чеежәр олн материал дасж авх кергтә. Зәрмдән алдр Жанһр дуудлвриг кесг частан дуулх кергтә болна. Намжлын келсәр, өдгә цагт баһчуд хальмг улсин мөнк зөөр болгч Жанһр дуулврар соньмсжахш. Теәд чигн Жанһрин ачнр нертә марһанд зун арвн сурһульч орлцв.
Тер саамд сцен деер Жанһрин баатрмуд хортнла догшн ноолда кежәнә. Уйн наста артистнр алдр дуулврин чинриг болн цергә баатр-зөмрг йовдлыг чикәр үзүлхәр шунв.
Келхд, Жанһрин баатр болһн эврә занг авьяста. Күнкн Алтн чееж әәлдәч, цецн ухата күн гиж нерән туурулсмн. Арслнгин Улан Хонһр болхла хамгин баатр-зөрмг, чидлтә баатр гиж тоолгдна. Орчлнгин сәәхн Мингиян көгжмч. Хальмг улсин алдр дуулврт баатрмудын мөрд ик чинр зүүнә. Сурһульчнр энүнә тускар эврәннь шинжлтдән бичв. Эднә келсәр. иим шинжлт кехин төлә нертә номтнрас, амн үгин зөөр сәәнәр меддг улсас соньн материал цуглулж авгдв.
Хальмг улсин амн үгин зөөр келмчнрин эвтә келнә билгәс тогтна, келмрч улс хурц келәрн күүндвр тогтана. Тегәд марһанд орцлсн сурһульчнр бас иим кеәвр дөрлдхәр зүткв. Элст балһсна эрдм-сурһулин заллтин ах специалист Булган Ангирован келсәр, иим марһанд бичкдүд орлцад, халмьг улсин уул авьяс зангшалла өөрхн таньлдж, сән медрл авна. Тегәд иим дөрлдәг жил болһн бүрдәх кергтә.
Марһана бүрдәһәчнрин келсәр, Жанһрин ачнр нертә дөрлдәнә ашт билгтә көвүд-күүкд йилһрнә. Эдн хальмг улсин алтн зөөр болгч сойлын тугиг цаарандан делскх зөвтә.
