Элстд православн әрүн шүтән ирх
Элст балһснд Астраханск областин Красный Яр селәнәс Иерусалимск Бурхна Экин хүрн шүтән ирх. Энүг нояюрин дөрвнд Казанск кафедральн чонжин сән өдрлә ирцүлж авч ирхмн. Православн шажна әрүн шүтәнә негнь әмт эдгәдг илвтә чидлтә гиж тоолгдна.
Марина Кириллован келсәр, Элст балһснд түрүн болж Иерусалимск Бурхна Экин хүрн шүтән иржәхин тускар сонсчкад, цуг кергән хаяд Яшалтаһас ирв. Әрүн шүтән православн улс дунд хамгин икәр күндлдг шүтән болжана.
Марина Кириллован келсәр, әрүн шүтән әмт эдгәдгин тускар сонсж. Энүнд иткжәнә. Эврәннь өөрхн улстан болн таньл үзлдән энүнә тускар келж өгх саната. Иим шүтән мана танһчд хая-хая ирнә.
Иерусалимск шүтән олн һазр эргәд нааран иржәнә. Энүнә мөргж зальврдг улст эрк биш туслна гиж келгднә. Бурхан Экин талдан әрүн шүтәнлә дүнцүлхлә, эн шүтәнд Бурхна Экин эк-эцкнр зурата бәәнә. Протоирей Алексейин келсәр, Бурхна чирхд өрк-бүл ямаран ик чинр зүүжәхин тускар шүтән дәкәд нег тодлулжана. Күн болһн күнд-түрү цагт эс гиж икәр геүрдәд зовсн цагт әрүн шүтәнә өөр зальврж мөргнә.
Протоирей Алексей Гришенко келсәр, Иерусалимск Бурхна Экин шүтән ик зовлнг үзжәх улст туслна, хаһлх хурц төрмүдтә улст, дөн түшг кергтә улст, өрк-бүлдән зволнгта улст дөн күргнә. Олн әмтн нааран ирәд, шүтәнд зальврж мөргх. Тиигхлә Бурхн эднд нөкд болад өрк-бүлинь батрулх. Шүтәнд мөргсн әмтн төвкнүн, ни-негн бәәхд туслна. Хамгин һол төрнь — шажнд шүттг улсин иткл батрх.
Иерусалимск Бурхна Экин әрүн шүтәнә тускар олн-әмтн дунд энүнә илвтә чидлин туцскар кесг домг бәәнә. Красный Яр селәнд Әрәсән булнг болһнас кесг әмтн ирж шүтәнд мөргәд, евәлднь күртнә. Шүтәнә өмн зальврад мөргсн күн олн-зүсн гемәс гетлж чадна. Ноябрин һурвн шинд әрүн шүтән Элст балһснд ирх. Энүг Казханск кафедральн чонжин цутхлнг залд залж тәвх. Ода чонжин эрст олн-зүсн ке-сәәхн зургуд зургдв.
Урднь энүнд зуг зеегтә зургуд зургдсн билә. Ода Палех балһсна зурачнр Христосин ном-сурһулин һол уха-сана медүлжәх зургуд зурж кеерүлжәнә. Православн чонжд ирсн күн болһн иим зургуд хәләчкәд чонжин туужиг болн православн шажна чинриг сәәнәр медж чадх.
Протоирей Алексей Гришенко келсәр, чонжд олн-зүсн зургуд зургдв, тер тоод алдр дәәчнрин зургуд бәәнә. Эдниг православн шажн әрүн улс гиж тоолжана. Талдан чигн әүрн улсин соньн зургуд зургдв. Иим зургуд урднь чонжд уга билә. Нааран ирсн православн шажнд сүзглдг улс эврәннь нүдәрн әрүн улсин зургуд хәләһәд, эдниг дәкәд нег тодлад, зальврж чаджана.
Ноябрин һурвнас авн долан күртл Казанкс кафедральн чонжд ирсн улс әрүн шүтәнд зальврж мөргх арһ бәәнә. Тер мет эдн шинрүлж кеерүлгджәх чонжиг һәәхж чаджана.
Ээнән Ольга, Мятежный Максим
