Келн-улсин оркестр өөнин байрт белдвр кежәнә
Ноябрин хойр шинд Элст балһснд хальмг танһчин келн-улсин оркестрин өөнд нерәдгдсн келн-улсин көгжмин хойрдгч фестиваль болх. Эн жил оркестр хөрн тавн жилин өөнән темдглжәнә. Байрин керг-үүлдврмүд бүкл жилдән бүрдәж давулгдв. Фестиваль товчлгч керг-үүлдвр болх. Энүнд оркестрин коллектив ик концертн программ белджәнә. Энүнд хальмгин артистнрла хамдан Ставрополин, Липецк балһсна болн Ар Осетин көгжмчнр билг-эрдмән үзүлх.
Хальмг келн-улсин оркестр эврәннь 25 жилин өөнән эн жилд темдглжәнә. Байрта өөн угтж, артистнр келн-улсин көгжмин хойрдгч фестивальд белджәнә. Эн керг-үүлдвр Элстд үкр сарин түрүн өдрмүдт болхмн. Тегәд эн өдрмүдт эдн ик белдврән төгсәжәнә. Хойрдгч фестивальд кесг регионмудас нертә көгжмчнр орлцх. Липецк болн Ставрополь балһсдас, Ар үзгин Осетяс артистнр ирхмн, дәкәд Москваһас «Лада» гидг коллективин дуучнр ирж орцлх гиж күләгджәнә. Дәкәд болхла, Гнесинә нертә Әрәсән көгжмин академин профессор Светлана Игнатьева ирх зөвтә. Мана таңһчин кесг артитснр дигтә эн нертә багшин сурһульчнр.
Тедн дунд — Шалхана Данара, Эдуард Бурлаков болн Муунян Гернзл. Светлана Игнатьева Хальмгур түрүн болж 1990 жилд ирсмн. Тер кемд Улан Барбаевна Лиджиевад нерәдгдсн дуучнрин марһана жюрид гешүн болж орсмн. Ода эн багш манна таңһчас бас нег оют Босхмжин Дианаг сурһжана.
25 жил гисн билг-эрдмәр авад хәләхлә баһ биш цаг. Әрәсән республикст бүрдәгдсн келн улсин оркестрмуд дунд Хальмгин коллектив түрүн болж тогтагдв. Артистнрин ик зуунь эн коллективд бүрдснәс авн түрүн өдрәснь көдлцжәнә. Тедн дунд — Ирина Гаврушкаеваһ Эн күүкд күн домбр цокна.
Байрта өөнд нерәдгдсн концертын программд классическ көгжм, Хальмгин нертә композитормуд Петр Чонкушовин, Аркадий Манджиевин дууна айсмуд, дәкәд болхла, урн-зокьялын дууд орв. Хальмгин оркестрин һол дуучнр соңсачнрт дурлсн болн кесг шин дууд белдсн бәәнә. Үлгүрлхд, Данара Шалханова «Самбрин һурвн толһа» гидг кезәңк хальмг улсин ут ду түрүн болж дуулж өгх, Мерген Ким Грачевин көгжмәр бичсн «Элст, Элст» гидг дууг дуулх. Эн дун хальмгин хотл балһсна зун жилин өөнд нерәдгдж 1965-гч жилд бичгдсмн.
Академическ, классическ көгжмд дурта улст өөрдж йовх амрлһна өдрмүдиг байртаһар давулж чадхмн. Үкр сарин нег шинд Липецк балһсна орс келн-улсин зевсгүдин оркестрин артистнр эврәннь билг-эрдмән үзүлхмн. Дарук өдртнь Хальмгин келн-улсин оркестр эврәннь өөнин концертән олна онгт тусхахмн.
Көкән Герл, Очра Сергей
