Инвалид улсин фестиваль болв

Хамдан цугинь кеж чадхвидн. Иим товч үгәр Әрәсән оддуд нертә урн һарин межрегиональн фестиваль болв. Энүнд танһчин цуг райодас инвалид улс ирж орлцв. Эдн цугтан муниципальн девснгин дииләчнр. Энүнд ик баһ уга цугтан дуулад, биилв, шүлгүд умшв. Иим улсин тускар инвалид гиж келж болшго.

Кубокмуд, күдлһнә һашгуд болн үнтә белг. Цуг эн ачлвр гмән дииләд, жирһлдән байрлад, ямаран күн болв чигн үүдәлтин хаалһар йовжах улст бәрүлж өггдх. Николай Арсенов эн фестивальд “Вокал” номинацд диилвр бәрв. Чанһ неквртә жюрин гешүд энүнә енсг сәәхн хоолыг өөднәр үнлв. Урднь баһ наста көвүн күн гемәр гемтсн бәәж. Никоалй дегд ховр гемрәр — цусн һархла кесгтән зогсдго гемтә билә.

“Звезды России” фестивалин орлцач Николай Арсеновин келсәр, бичкн цагтан долан нас күртл цусн һархла зогсдго бәәсмн. Эмчнр энүнд эм оурлад, гемиг эдгәв. Ода эрүл-менднь ясрв.

Зурач Денис Курдюков нурһлж йиртмжин, хоосн бодлһин болн дурна тускар зургудан зурна. Художественн эрдм нертә номинацд түрүн орм эзлв. Денис эврәннь зургудан карандашар эс гиж акварельн ширәр зурна. Цуг инструментиг баһ наста көвүн шүдндән бәрж олзлна. Арвн һурвн жил хооран электрокүчнә шав авад, хойр һар уга үлдв. Тер бийнь зовлнгдан даргдсн уга. Ода Денис танһчин урн һарин эрдмин инвалид улсин марһасин лауреат болв.

Денис Курдюковин келсәр, Санкт-Петербург балһсна больницд кевстн цагт, нег көвүн энүнд шүдәрн зург зурх эрдм дасхж.

Инвалид улс бәәдл-жирһлин хаалһд ямаран күнд-түрү йовдлла харһдгин утскар Владимир Халгинов келж өгв. Нүднә харань му хойрдгч багин инвалид кесг цагтан көдлмш олж авсн уга. Эрүл-менднь му гиһәд көдлмшт авдго бәәж. Бийдән иткж немр чидл энүнд дун өгв.

Фестивальд билг-эрдмән ик-баһ уга цугтан үзүлв. “Досвятки” нертә ансамбльд тәв һарсн улс орна. Медәтә улсин эрүл-мендь ода дегд сән биш.

“Досвятки” ансамблин һардач Светлана Балабанован келсәр, иим фестивальд орлцсндан цуг медәтнр ик байрта бәәнә. Эдн ду дуулхдан йир дурта.

Фестивалин программар орлцачнр олн-зүсн номинацд дөрлдв, тер тоод дууна, бииһин, урн һарин эрдмин марһаст орлцв. Эдниг инвалид улс гиж келж болшго. Чанһ-чиирг, ик байртаһар олн-зүсн дөрлдән эдн билг-эрдмән үзүлв.

Ода Хальмг танһчд хөрн һурвн минһн инвалид улс бәәнә. Эдн цугтан мана дөн-түшг күләжәнә. Иткл нертә социосойлын цутхлнг Хальмгт буйнч седклин керг-үүлдврмүдиг хойр минһн йисдгч жиләс авн бүрдәж давулжана. Болв иим фестиваль түрүн болж бүрдәгдв. Энүнд танһчин цуг райодас әмтн ирж орлцв. Эдн хамдан цуглрад, өөрхн таньлдад, билг-эрмдән үзүлж чадв.

Елена Алексенко, Эрнжәнә Эрднь