Элст балһснд хойр сарин эргцд эрдм-сурһулин учрежденьсин ик зунь шинрүлж ясгдв
Хальмг танһчд сурһулин шин жилд школмудын белдвр бүрткж хәләгджәнә. Элст балһснд хойр сарин эргцд эрдм-сурһулин учрежденьсин ик зунь шинрүлж ясгдв. Шишлнг комиссин ханьд пожарн инспекцин, хотл балһсна администрацин, Роспотребнадзорин көдләчнр орв. Эдн эн долан хонгин чилгч күртл школмуд бүрткж хәләх. Мана үүдәгч баг иим нег бүртклһнд орлцад, школмуд яһж шин жилд белдсинь эврәннь нүдәрн үзв.
Эн школд талдан эрдм-сурһулин заведеньсла әдл сурһульчнриг шин жилд тосж авхин өмн комиссь тосж авчана. Комиссин гешүд цугинь бүрткж хәләжәнә, тер тоод коммуникацас авн терз-үүд бүрткж шинжлв. Эрдм-сурһулин әнгин, Роспотребнадзорин, пожарн инспекцин специалистнр хәләврин хөөн эврәннь цаасндан темдг тәвжәнә. Келхд, дуту-дунсдин заагт Роспотребнадзорин элчнр хот-уудг һазрт технологическ оборудовань ясрулһна тускар селвгүд орулжана. Элст балһсна администрацин эрдм-сурһулин заллтин көдләчнрин келсәр, хотл балһсна цуг эрдм-сурһулин заведеньс эн халхиг шинрүлһнә программар кергтә оборудованяр теткгдв. Ода Элст балһснд хөрн негн школ көдлжәнә.
Элстин эрдм-сурһулин заллтин әнгин ахлач Елена Ширипован келсәр, сурһулин шин жилд школд цуг документац бүрткж хәләгдв. Элстин олн халхта гимназьд шишлнг сурһулин программ болн сурһулин зура батлж авгдв. Сентябрин нег шинәс авн Әрәсәд эрдм-сурһулин шин закан үүлдврт орулгджахас иштә ирлцнһү сольвр орулгдж. Ода гимназьд цуг багшнр бәәнә.
Элст балһсна олн халхта гимназин директор Клим Насуновин келсәр, сурһулин шин жилд белдврин ик көдлмш кегдв. Хотл балһсна администрац шеолын герин ора шинрүлж яслһна төлә хойр зун минһн арслнг йилһж өггдв, йирн хойр миинһн арслнг хаша кехин төлә олзлгдв. Ясврин көдлмшт эк-эцкнр ик нөкд болв.
Олн халхта гимназин директор Клим Насуновин келсәр, федеральн программар тавн багш ирх зөвтә. Эклц классмудын сурһульчнрин төлә учебникүд хулдж авгдв. Ах классмудын сурһульчнрин төлә учебникүд хулдж авхин төлә тавн зун минһн арслнг йилһж өггджәнә. Ода деерән хаһлх хурц төрмүд уга. Цуг кергтә аппаратур, техник болн оборудовань көдлжәнә.
Хотл балһсна зәрм школмуд шинрүлж кегдсн ясврар эк-эцкнриг болн бичкдүдиг байрлулсн деерән, өдгә цагин некврлә ирлцәтә оборудовань хот-хол кедг блокт углж тәвгдв. Хот-хол кедг һазрт иим оборудовань хулдж авхин төлә һурвн зун минһн арслнг һарһж өггдсмн. Тер мет спортивн залд бас оньг тусхагдв. Энд ораһинь цаһалһад, терз-үүд сольв. Ода зуг полын ширдх көдлмш үлдв. Лайф Гимназин директор Клим Насуновин келсәр, хуучн терзиг шин пластикин терзд шинрүлв. ДСП-н ормд фанер делглв. Иим фанерас халхла му үнр һархш. Эннь бичкдүдин әәмшг уга бәәлһнә төлә кегджәнә.
Ода Әрәсәд школмудыг шин сурһулин жилд шинрүлж яслһна көдлмш бүрткж хәләгджәнә. Элст балһсна цуг эрдм-сурһулин учрежденьст сурһулин жил сентябрин хойрла байрин линейкар эклх. Кемр школмудт сурһулин шин жилд белдврин көдлмшт хаһлх төрмүд бәәхлә, директормуд седвәр татад, хотл балһсна һардврт зәнглх зөвтә.
