Элст балһсн эврәннь зун дөчн доладгч өөнән темдглв
Элст балһсн эврәннь зун дөчн доладгч өөнән темдглв. Эн өдр кесг спортын марһас болв, һәәхүлмүд көдлв, соньн фестивальмуд болн концертмуд үзүлгдв. Асхлад Әрәсән эстрадн оддуд орлцата ик концерт болв, ке-сәәхн фейерверк тенгр кеерүлв.
Байрин өдр чилгр сән өдр болв. Өрүн эртәс авн дуларад, нарн һарад, йоста зунын бәәдл һарв. Элст балһсна олн плошадкст нәр-наадн болв, талдан чигон байрин керг-үүлдврмүд бүрдәгдв. Цецгүдин бал эднәс хамгин ке-сәәхн болв гиж темдглх кергтә. Цецгүдин бичкн баглас олн улс нүд авлж, байр үүдәв. Энүнд орлцсн цуг әмтн ке-сәәхн цецгүдән үзүлж, хотл балһсна улсиг боллн гиичнриг өврүлв. Тер мет нааран ирсн әмтн цецгүдин өвәрц һәәхүл хәләв. Харм төрхд, цецгүд удан бәәхш. Цөн цаг болад эдн үрәд хуучрна. Тер бийнь һәәхүлд ирсн әмтн цецгүд урһадг улст ик ханлтан өргв. Нег үлү, юәәхлд ирсн әмтн ке-сәәхн цецгүд үзсн деерән, седклдән тааста көгжм сонсад, чикнә хужран ханһав.
Давсн бембә өдр Элст балһсна цутхлнг талвнгд олн әмтн цуглрв. Нааран ирсн улс эврәннь дурта эрдмәрн дөрлдж чадв, бичкдүдт болхла олн-зүсн аттракционд наадв.
Байрин керг-үүлдврмүдт орлцсн әмтн энд халун хот ууһад, ундан ханһаж чадв. Эднд бүрдәһәхчнр халун жомба болн боорцг белдж. Баира Бадмаеван келсәр, хальмг цә йир таасгдв. Гертән жомба хая-хая ууна. Тегәд нааран ирәд, цә ууһад, сән болв.
Өдгә цагт Элст балһснд найн келн-улсин элчнр бәәршлжәнә. Эдн цугтан эврәннь сойлан үзүлж, авьяс зангшалл гиичнриг таньлдулв. Олн келн-улсин элчнр ке-сәәхн хувцан өмсәд, дуулад-бииләд, эврәннь авьясар белдсн хотар олн улсиг тоов. Элст балһсна сити-менеджер Артур Дорджиевин келсәр, иим байр хамгин түрүнд олн келн-улсиг негдүлж, иньглт батрулна. Элст балһсн цаарандан керәд, сәәхрх зөвтә. Эннь хотл балһсна һарсн өдр болжана. Хәләтн олн келн-улсин элчнр нааран ирв. Цуг әмтн хоорндан ни-негн бәәх зөвтә.
Эн өдр өрк-бүл тогтасн баһчудт хойр дам байр болв. Эдниг сенетябрин арвн тавнд Элст балһсна цутхлнг талвнгд темдглж бичәд, йөрәв. Тер саамд хотл балсһна Арбатд баһ наста көвүд-күүкд өдгәц агин би биилдг дасж үзүлв. Эдн хоорндан дииләчән йилһв. Болв хамгин онц орм хотл балһсна байкермуд эзлв. Эднә сәәхн болн чилтә мотоциклмуд әәһәрн эргндк аһу дүүргв. Квадрациклд зурган цугт улс цокулхар седв. Мана телекомпаня архивд нег минһн йисн зун тәвн йисдгч жилд Элст балһсна байр яһж болсн туск зхург бәәнә.
Тиихд хотл балһсн йирн дөрвн жилин өөнән темдглсн билә. Хот балһсн тер цагт тас талдан бәәж. Хаалһар муниципальн автобусмуд йовжала, зәрм микрорайод болн уульнцс шинкн тогтсмн. Ода болхла зун дөчн долан жилин өөнд Элст балһсн улм кеерәд, сәәхрв. Байрин өдриг элстихн болн кесг гиичнр сергмжтәһәр давулж, икәр байрлж шуугата нәр-нааднд орлцв.
Хавтхна Элла, Хавтхна Анатолий, Колдан Церн
