Бичкдүдин автосуудл уга йовхла ик ял өгхмн
Машинд автосуудл уга болхла һурвн минһн арслнг ял өгх кергтә. Насни дигт күрәд бичкдүдин әәмшг уга йовлһна тускар эс ухалжах жолачнриг шин закаһар чанһ засгла харһулх. Шин закан сентябрин нег шинәс үүлдврт оржана. Энүнә тускар госавтоинспекцин көдләчнр шишлнг рейд кев. Энүнд мана зәнгч Ээнән Ольга бас орлцв.
Бичкдүдиг яһж автосуудлд дасххин тускар Жирһл Бадугинова икәр зовжахш. Кира күүкн төрсн цагт энүнә эк-эцкнь бичкдүдин автосуддл тер дарунь хулдж авч. Ода күүкн нег нас һарв. Иим суддлд сууһад Кира күүкн дасчкв. Машиһар балһсна уульнцар эктәһән йовхд бичкн күүкнд таасгджана. Жирһл Бадугинован тоолврар, иим автосуудл әмшг угаһар йовлһ тетксн деерән, бичкн күүкн сууудг эвтә орм болжана. Бичкдүд иим суудлд удан йовж чаджахш гиж зәрм машидын эздүд ГИБДД-н көдләчнрт келснь, автоинспектомрудыг иткүлсн уга. Блиц 1 — эн жолачин темдглсәр, эдн хол һазрас нааран ирж йовна. Һурвн минһн дуунад бичкдүд автосуудлд сууж чадшго. Тегәд иим эв-арһ олзлжахш.
Тер саамд хаалһин полицин көдләчнрин то-дигәр, бичкдүд орлцата хаалһд зеткртә йовдлмудын то өсәд йовна. Эн жилин долан сарин эргцд тәвн негн зеткртә йовдл учрв, энүнә ашт һурвн бичкдүд әмнәсн хаһцв, жирн хойрнь шав авсмн.
ГИББД-н заллтин инспектор Василий Кекеевин келсәр, бичкдүд орлцата хаалһст зеткртә хөрн йисн йовдл учрв, энүнә ашт һурвн бичкдүд әмнәсн хаһцв, һучн долан көвүн-күүкн шавтв. Эдн цугтан автосуудл уга йовсн бәәж. Гиигчн машид орлцата һучн негн зеткртә йовдл болв, автобуст һурвн бичкдүд шавтв.
Эк-эцкнр эн туст зака күцәжәнь рейдын йовудт медгдв. Автомашидын салонд йисн-арвн негн наста бичкдүд әәмшг угаһар йовлһна бүсәр бүслгдснь үзгдв. Болв зәрм жолачнр эн зака эвдәд, авто суудл олзлжахш. Тер бийнь иим зака эвдсн улсиг чанһ засгла харһулх закан жолачнрин даавриг икдүлв. Оньдин ик ял өгхин ормд бичкдүдин автосуудл хулдж авснь деер болна. Шин закаһар ялын кемжән автосуудлин үнлә әдл болжана.
Шин закан сентябрин нег шинәс авн үүлдврт орх. Тиигхлә машидын жолачнр ик ял өгхмн. Бичкдүдин автосуудл машинд уга болхла һурвн минһн арслнг ялд унхмн. Ода болхла зуг тавн зун арслнг ял өгчәнә. Шин закаһар чанһ засгла харулгдсн жолачнр ухан тунһаһад машинд хамгин үнтә үрдүдән авч йовхин тускар санх зөвтә.
