Хальмгт күндтә Намка Дриме Ринпоче залрж ирх
Элст балһснд шажна ик чинртә керг-үүлдвр болх. Буддийск ниицәнә үрврәр мана танһчд һурвдад күндтә багш Намка Дриме Ринпоче залрж ирх. Эн саамд танһчин улст хойр тантрическ авьяс күцәх, тер тоод долан хонгтан ик мөргүл кехмн. Эн кергт танһчин һардачнр дөн күргжәнә. Цааранднь тодрхаһар эн төрәр мана сюжетд келгджәнә.
Шажнд шүттг улсин келсәр, мана танһчин әмтнд ик байрта йовдл учрх. Йидам Гонгду нертә буддийск үнтә ном-сурһулиг Алдр Багш эврәннь жирлһин хаалһдан зуг һурв дәкж өгсмн. Тер ттоод Төвдин, Индин болн Бразилин орн-нутгудт иим сурһуль өггдлә. Ода гүн ном Әрәсән улс сонсх. Хальмг танһчин хотл Элст балһснд күндтә багш долан хонг болад ирх. Августын хөрн һурвнас авн сентябрин долан күртл Намка Дриме Ринпоче хойр ик тантрическ шажна керг-үүлдвр күцәх. Тер тоод Хаягрива Бурхна Друбчен мөргүлиг долан хонгтан күцәх, олн-зүсн евәлин мөргүлмүд кех. Иим гүн болн ик чинртә тантрическ дамшлт цуг әмтә тоотд олз-туста болж, евәл белглнә, әмтн хоорндан ни-негн эвин кевәр бәәнә гиж келгднә. Хонюр Нерюповин келсәр, хамг му тоот уга кегднә, хамг сән цуглрад өснә.
Намка Дриме Ринпоче Хальмг танһчд хойр дәкж залрж ирсн билә. Шажнд сүзглдг улсин тодлсар, мана танһчд күндтә багш ирсн цагт сән темдгүд учрдг бәәсмн. Һал тәәсн өдр догшн халун номһрад, хур орад, оһтрһу ду һарв, һал цәклв, энүнә хөөн тенгрт доһлнг эмгн һарч ирв. Цуг эргндк тоот хүврәд, сәәхрв. Тиигхд Бурхн Багшин гүн ном-сурһуль Бурхн Багшин алтн сүмин аһуд болсмн.
Эн саамд цуг шажна керг-үүлдврмүд Элст балһсна доладгч микрорайонд болх. Элст балһснд ирх олн гиичнрин төлә, тер тоод Әрәсән болн һазадын ордудын буддистнрин төлә палатксин балһснд бүрдәгдх. Күндтә Багшиг дахж ирх өөрхн улс болн элгн-саднь, болн Непалын болн индин гелнгүд Сити-Чесс балһснд бәәршлх. Бүрдәһәчнрин келсәр, ода шажна керг-үүлдврт орлцх улсин төлә маань барлгдв. лайф Бүрдәмжин комитетин гешүн Аркадий Белякиновин келсәр, цокольн давхрт сурһулин класс секх зура бәәнә. Энүнд Непалас болн Индәс багшнр ирәд, ном-сурһуль заах. Энүнд баһчуд сурч чадх. Эдн хол һазрт одлго, дор ормдан Бурхн Багшин ном дасж чаджана. Бичкн цагас авн ном-сурһуль дасх зөвтә.
Ньигма школын зангшалын хурлын комплекс Троицкое селәнд тосхгджана гиж журналистнрт зәнглв. Эн шажна тосхлт Намка Дриме Ринпочен евәләр тосхгджана. Хурлын төсвиг танһчин нертә архитектормуд Владимир Гиляндиков болн Сергей Курнеев белдв. Тер мет района администрацин толһач Виктор Джанджиев бас эн тосхлтд орлцжана. Келхд, Виктор Джанджиев мана танһчд тосхгдсн олн шажна обьекткмуд һардж тосхсмн. лайф Хонһр Нерюповин келсәр, танһчин толһач Алексей Орлов цуг халхансь дөн күргжәнә, онц оньг тусхажана. Танһчин талдан чигн һардачнр нөкд болжана.
Күндтә багш Намка Дриме Ринпоче мана танһчд залрдж ирхд танһчин һардачнр дөн болжана.
