Әрәсән болн Хальмгин номтнр селекционн хәәвр кежәнә
Эн өдрмүдт цуг мана орн-нутгар делгрлт авчах дамшлтын түрүн девснг төгсжәнә. Ода Әрәсән номтнр болн дамшлтын үүлдәчнр селекционн шунмһа хәәврт бәәнә. Урднь олзлсн эв-арһсла зерг зоотехникүд олн-зүсн тохма бухмудын үрсиг талдан тохма үкрмүдлә цусинь холяд, искусственн кевәр көг тәвжәнә.
Эн сүрг зун найн үкрәс тогтна. Нәәмн наста үкр эн сүргт орна. Эдниг зоотехник Алексей Бугдаев бүрткж хәләжәнә. Ода сүргин үкрмүдин ик зунь искусственн көг тәвлһнд орв. Эн үкрт болхла иим кевәр хамгин сүүлднь көг тәвгдхмн. Нег өдрин эргцд эн үкр хойр дәкж шишлнг хашад орх зөвтә. Эннь иим эв-арһин неквр болжана. Хальмг танһчин селәнә эдл-ахун министрин дарук Василий Бариновин келсәр, ода иим көдлмш зурһан эдл-ахуд күцәгджәнә. Иим кеәвр үкрмүдәс ямаран төль авгдхнь ил медгднә. Энүнә төлә тавн зун олн-үзсн тохма бүхмуд олзлхин ормд, зуг тавн хамгин сән тохма бух олзлгдна.
Башкирин, Саратовск, Оренбургск болн Челябинск областьмудла хамдан Хальмг танһчин зурһан эдл-аху иим ик селекционн дамшлтд орлцжана. Эн регионмуд Әрәсән махан бүс нертә программд оржана. Иим ик чинртә дамшлт күцәхин төлә Хальмг танһчин селәнә эдл-ахун министерствд дөрвн үрс олзлх шиидвр авгдв. Хальмг танһчин эдл-ахусд бәәх бухмудын үрслә зерг хальмг тохма өмн үзгин уралын, Красный Ангус нертә болн Америкин Санта Гертруда тохма бод мал олзлгджана. Көг тәвсн хөөн йисн сар болад, сән тохма туһлмуд үкрмүдәс авгдх. Онц келхд, Хальмг танһчд иим тохма бод малын цусн бас хольгдсн билә. Нег минһн йисн зун жирдгч жилмүдт номин нертә үүлдәч, билгтә бичәч Нармин Морхаж иим дамшлт күцәһәд, сән чинртә мах өдгдг тохм һарһж авсн билә. Харм төрхд, номтын кеж-күцәсн дамшлтнь ода геедрв. Тегәд өдгә цагт иим көдлмш шинәс кегджәнә. Адуч нертә крестьянск-фермерск эдл-ахун зоотехник Алексей Бугдаевин келсәр, иим тохма бод мал ахр болзгт ик чивхтә болна. Арвн зурһан сар күрхлә иим бод мал тавн зун килограмм татна гиж Бугдаев темдглв.
Арвн нәәмн сар болад номтнрин болн малчнрин күцәсн хамцу дамшлтын ашнь медгдхмн. Тер цагт үкрмүдәс авсн туһлмуд сән чинәтә болх. Эдн дундлад тавн зун килограмм татх зөвтә.
Хавтхна Элла, Бадмаран Владислав
