Лаганск районд Хальмгаһар келтн нертә клуб көдлжәнә

Хальмг кел делгрүлһнә туск төриг Лаганск районд өвәрц кевәр хаһлжана. Энд Хальмгаһар келтн нертә клуб тогтагдж көдлжәнә. Клубд района күн болһн ирәд, төрскн келән дасж чадх.

Өдгә цагт хальмг кел даслһна төр хамгин хурц төрмүдин тоод йовна. Төрскн кел делгрүлһнә төлә кесг сурһулин программс, сойлын керг-үүлдврмүд, кружокмуд бүрдәгдсн бәәнә. Тиим кичәлмүд Лаганск района администрацд бас давулна. Эн жилин эклцәс авн администрацин көдләчнр долан хонгтан нег дәкж цуглрад, «Хальмгаһар келтн» нертә клубд төрскн келән дасжана.

Эн кичәлд баһ наста специалистнр эврә дурар ирв. Зәрмнь хальмг келән му биш меднә, талдан улс болхла шинкн төрскн келндән оржана.

Геннадий Очировин келсәр, эн клубын тускар сонсчкад, эрк биш орлцхар шиидв. Эврә келән, сойлан, авг-бәрцән медх кергтә гиж Геннадий келнә.

Багшнр Евдокия Цагановна Очирова болн Софья Тобжиевна Лиджи-Гаряева темдглсәр, эн кичәлмүдин нилчәр, ода баһчуд хальмг келәр умшж болн келж чаджана. Кичәлдән болхла оньган өгәд багшнран сонсна.

Правительствин аппаратын заллтын ахлач Николай Санджиевин темдглсәр, танһчин талдан райод Лаганск района администрацас үлгүр авх зөвтә.

Тегәд үлмж өдр болһн багшнр болн администрацин специалистнр харһад, төрскн келән дасад, хоорндан күүндәд цаган олз-тустаһар давулна.

Шаран Баира, Харлун Бадма, Хавтхна Анатолий