Һазадын орна паспорт авхин төлә элстихн өрүн эртәс авн чеерүдт зогсна
Зунын дунд сар төгсж йовна. Эн халун өдрмүдт олн әмтн талын һазрт одад, амрлһна кемән давулх саната. Болв эн жил һазадын ордудт һарч йовх улст боомтг учрв. Ода һазадын орна паспорт авхд күнд болв. Миграционн церглтин герин өөр өрүн өрләһәс авн ик чеерүд хуржана. Иим паспорт авхд үнтә болх гисн зәнг кесг улсиг икәр үүмүлв. Болв иим зәнг худл бәәж.
Өрүн болһн тавн часас авн миграционн церглтин герин өөр ик чеерүд зогсна. Болв иим эрт нааран ирсн бийнь, кергтә туслмж авх бат ицл уга. Тегәд чигн элстихн чеерүд зогсжах улсин нерд бичжәнә. Тер тоод оютн Амра Нимеева бас чеерүдт бичгдв.
Миграционн церглтин әнгд дөрвн өдр дарандан ирсн бәәж. Нег үлү, документан өгхәр ирсн уга, зуг талончик авхар иим эрт ирж. Иим улсин нердиг әмтн девтрт бичж авчана. Иим кевәр чеерүд тогтагдна. Иим девтриг күн болһн дурта улс авад, чеерүдт ирсн улсин нерд бичнә. Оютн Амра Нимееван келсәр, дегд энд күн дала. Өрүн өрлә ирх кергтә болна. Зәрм улс толон авхар сөөһәр ирнә. Урднь иим ик чеерүд цуглрдго бәәсмн. Гиляна Очирован келсәр, оньдин списк кегднә, олн улс сө ирнә. Зәрмдән списк шуулна, дәкнәс цаас бичнә гиж Гиляна һундлтаһар келнә.
Миграционн церглтд ода оютнр, пенсионермуд болн нилх үртә экнр ирәд, кесгтән едт зогсна. Эдн цугтан зунын кемд һазадын ордудт одад, амрх саната. Иим туслмж өгснә мөгнгә кемжәг эс икдүлсн зәнг һарсн биш болхла иим олн күн нааран иршго бәәсмн гиж миграционн церглтин әнгин көдләчнр келнә. Ода өдгә цагин неврлә ирлцәтә һазадынт орна паспорт һарһж авхин төлә күн болһн хойр дундур минһн арслнг өгх зөвтә, арвн дөрвн нас күрәд уга бичкдүдт болхла иим паспорт нег минһн хойр зун арслнган һарһж өггднә. Хальмг танһчар миграционн церглтин әнгин ахлач Сергей Шлыковин келсәр, эндр өдрт һазадын орна паспортын мөнгн икдшго. Иргч жиләс авн һазадн орна паспорт тас талдан болх, тер бийнь мөнгн өсшго. Шин паспортд күн болһна һарин хурһна эрә орулгдх.
Сүл цагт миграционн церглтин әнгд иржәх улсин то кесг холванд икдв гиж Сергей Шлыков темдглв. Болв нааран ирлго, интернетар дамжулад, государственн туслмж авхин төлә темдглж бичгдж болжана. Иим эрлһн электронн эв-арһар йовулгдна. Эн жилин зунын эклцәс авн һазадын орна паспор авхин төлә зун найн эрлһн орж ирв. Сергей Шлыковин келсәр, нег өдртән мана церглт дала улст туслжм күргж чадшго, үд күрт дөчн-дөчн тавн күн орж чадх. үдин хөөн зун хөрн-хөрн хойр күүнәс документ авгдна. Өдртән дөчн-жирн күүнд паспорт өггднә гиж Шлыков зәнглв.
Һазадын ордудт одад, амрх саната улс, хувц-хунран болн болн талдан чигн кергтә тоотан белдж авхин өмн һазадын орна паспорт цаглань һарһулж авхин тускар ухалх зөвтә. Туристическ фирмсин то-дигәр, жил ирәвс һазадын ордудт һарч йовжах улсин то икдәд йовна. Тегәд чигн иим паспорт авх улсин то бас ик болжана. Ода миграционн церглтин әнгд өдртән зуг далн күүнд туслмж күргж чадна.
Ээнән Делгр, Хавтхна Анатолий
