Һан халунас көлтә мана танчһд бачм чинртә бәәдл зарлгдв
Эндр Хальмг танһчд догшн һан халунас көлтә бачм чинртә бәәдл зарлгдв. Олн жилдән болжах һан халун агропромышленн компекст му нилчән күргжәнә. Жил болһнд һардг һаруһас көлтә селәнә эдл-ахус күнд бәәдләс һарх шиидвр хәәж авчана. Хальмг танһчин агрономст болн малчнрт дөн күргхин төлә күцәх керг-үүлдврмүдин зура правительств батлж авчана.
Өдгә цагт догшн һан-халун болснас көлтә хальмг танһчин цуг аһуд бачм чинртә бәәдлд зарлгдв. Иим һан халун мана танһчд хойр жил дарандан болжана. Баһ Дөрвдә района селәнә эдл-ахус болхла долна жилдән догшн халунас көлтә түржәнә, Сарпинск районд иим догшн һан зурһан жил дарандан болжана. Иим бәәдлд селәнә эдл-ахун предприятьмудын экономик делгрлт авчахш.
Баһ Дөрвдә района администрацин толһач Геннадий Золочевский келсәр, районд июлин арвнас авн бачм чинртә бәәдлд орулгдв. Һазр дегд икәр хагсад, тәрән үрж одв. Одла цуг тәрәнә аһуһас найн процентнь үрв. Зурһан жил дарандан болсн һан халунас көлтә эдл-ахусин бәәдл күнд бәәдлд тусв.
Сарпинск района администрацин толһач Юрий Жуковин келсәр, районд бас бачм чинртә бәәдлд зарлгдв. Энүнәс көлтә һарсн һаруг государств данцах гиж нәәлжәнәвидн. Ода хөрн һурвн дундур минһн гектар тәрән үрж одв, Йирн дөрчн сай арлснг һару данцахинь күләжәнәвидн. Ода болхла олна малын төлә хот белдж авчанавидн. Тер мет бүүдян урһц хураж авлһна көдлмш кегджәнә. Гектар болһнас дундлад зун нәәмн центнер буудя цокж авгджана. Урһц дегд му. Зуг дөрвн минһн тонн буудя хураж авгдв. Урднь болхла зун минһн тонн бууяд хураж авдг билә.
Давсн жилд мана танһчд тәрән урһц зун хөрн минһн гектарт үрсн билә. Эн жил оперативн то-дигәр буудян болн олна малд белдж авдг өвснә урһц жирн зурһан минһн гектарт үрв. Тер мет догшн һан халунас көлтә малын идг бас му бәәдлд тусв. Эн жил танһчин ар үзгин болн деед үзгин райодт өвснә урһц мууһар һарв.
Көтчнрә района администрацин толһач Валерий Очировин келсәр, района цуг селәнә эдл-ахус талдан регионмудт малын хот белдж авла. Эврәннь царнгудт өвсн мууһар һарв. Тер бийнь өвс хадж авчана. Энд механизатормуд зун арвн тавн-хөрн процент өвс хадж авх. Тегәд талдан һазрт өвс белдж авчана. Ода механизатормуд Ростовск, Волгоградск областьмудт болн Ставропольск крайд көдлжәнә.
Хаврин зузын кемд хур баһар орснас көлтә Хальмг танһчин селәнә эдл-ахус үвлзлһнд белдврән мууһар кежәнә. Келхд, май сард кергтә чиигәс зуг тәвн процентнь орв. Тер мет һазр дөчн нәәмн-тәвн зурһан градуст халв. Энүнә тускар селәнә эдл-ахун министерствд үүмәтә күүндвр болжана.
Танһчин селәнә эдл-ахун министрин дарук Геннайди Рогозина келсәр, олна малд хот йир баһар белдж авгджана. Эн туст хамгин күнд бәәдл Яшкульск болн Көтчнрә райодт тогтв. Энд олна малын то ик. Болв хамгин түрүн бәәдл Баһ Дөрвдә болн Сарпинск районд тогтв. Энд үвлд кергтә малын хотын кемжәнәс зун нәәмн процентнь белдж авгдв. Сарпинск района селәнә эдл-ахусд правительств дөн күргх. Энүнә төлә көрнгин сангас мөнгн йилһж өггдх. Энүнә тускар документ белдгдв, ода финансин министерствла зөвшәлт кегджәнә.
Жил болһн һан халунас көлтә түржәх танһчин ар үзгин райодт дөн күргхин тускар правительств шиидвр белджәнә.
Танһчин правительствин ахлач Игорь Зотовин келсәр, долан жилдән болжах һан аюлас көлтә райодын агропромышленн комплекс күнд бәәдлд бәәнә. Федеральн правительств энүнә тускар меднә. Тегәд хамдан ямаран нөкд болхин тускар шиидвр белджәнәвидн. Тер мет иргч жилин зура бас батлж авгджана.
Танһчинс еләнә эдл-ахун министерствин то-дигәр, танһчин деед үзгин райод хойр жил дарандан буудян урһцин өрәлинь геежәнә. Эн жил Городовиковск районд зуг дөчн һурвн минһн тонн буудя хураж авгдв. Эн кемжән һару данцахд күртшго. Селәнә эдл-ахун министерствин специалистнрин тоолврар, ода зуг немр кредитн мөнгн кергтә.
Хавтхна Элла, Мятежный Максим
