Зурһан поселкин әмтн хаалһ уга болад түржәнә
Баһ Дөрвдә района хол селәдин хоорнд хату десвкртә хаалһ уга болснас көлтә бәәрн әмтн зовлн үзжәнә. Эн туст Зурһан поселкин әмтн ик түрү бәәдлд тусв. Хам-хоша бәәх Ханата селәнд көдлмштән күргдг арһ уга, района цутхлнг селәнд одад, хулд кеж болхш. Намрин кемд бальчгт машид йовж чадхш, үвлин кемд болхла цасн-шуурһн бас йовдг арһ уга болна. Иим бәәдлд бәәрн әмтн дасад, тесжәнә. Зуг эдн дару-дарунь тенгрин бәәдлин туск таавр сонсад, күцәх зураһан үрдаснь темдглж авчана.
Хур баһар орад, хааһлд ик бальчг болсн уга. Тегәд чигн мана үүдәгч багин машин Баһ Дөрвдә района зурһан поселкд күрч чадв. Бәәрн улсин темдглсәр, хйор өдр болда ирсн болхла, машин эрк биш бальчгт унх бәәсмн. Энд бәәх улст хур орхла, талдан селәдт күрдг арһ уга. Района цутхлнг селән күртл күхн төлә, хату девскртә хаалһд тусхин төлә сән хаалһ угаһар йовһар арвн зурһан дуунад йовх кергтә болна. Машита улс болхла бас түрү үзнә. Теегин хаалһд энд-тенд нүкн дала, техник хамхрна. Манж Дорджиевин келсәр, хаалһин төр Зурһан селәнд йир хурц төрт хүврв. Нег үлү, оютнрт Баһ Дөрвд селәнд күрхд йир күнд болна.
Дөвр жил хооран танһчин һардачнр поселкс хоорндк хаалһиг муниципалитетмудын медлд өгв. Баһ Дөрдәв районд селәд хоорндк хаалһс ут-тоодан хйор зун дөчн дууна тогтажана. Эднәс зуг цөн дуунад шебень асхдг, цөн дуунад грейдер кегдв. Хаалһсин ик зунь зуг теегин хаалһс. Селәд хоорнд дегд ик хол биш, дундлад арвн —арвн хойр дуунад бәәнә. Тегәд кеер зууран машин хамхрла, талдан машид ирәд нөкд болх нәәлвр бәәнә. Нег үлү, иим таал тоод авгдад, бәәрн бюджетд мөнгн йилһж өггднә. Ханатинск селәнә муниципальн бүрдәцин толһач Санж Кононовин келсәр, селәд хоордн хаалһс ясхин төлә бюджетд мөнгн уга. Зуг бачм чинртә бәәдл тогтхла ясвр кегднә, поселк дунд бәәх хаалһс ясгдна. Дундлад зуг арвн — арвн тавн минһн арслнг йилһж өггднә.
Района һардачнрин цәәлһсәр, хату девскртә хаалһс бәрх мөнгн уга. зуг Хончнур селәнә улс хаалһта болх. Әрәсән хаалһс нертә федеральн программар иргч жилин январь сард Баһ Дөвр селәнд күрдг тавн дуунад хаалһд асфальт делггдхмн. Энүнә төлә тәвн сай арслнг кергтә. Баһ Дөрвдә района муниципальн бүрдәцин ахлач Геннадий Золочевский келсәр, ода бәәрн муниципалитет хаалһсиг ясж чаджахш. Энүнә төлә мөнгн уга. Хаалһин заллтин предприять күнд бәәдлд тусв.
Хол селәдт бәәх әмтн йостаһан түржәнә. Энд бәәсн әмтн талдан улсас дегд мууһар бәәнә. Кезә энд сән чинртә хаалһ татгдхнь күн медхш. Иим хаалһ нааран ирх гиж селәнә улс ода нәәлдгән уурв.
Санкун Кермн, Колдан Церн
