Элст балһснас Крымск балһснд түрүн гуманитарн дөн йовулгдв

Давсн сөөһәр Элст балһснас Крымск балһснд түрүн гуманитарн дөн йовулгдв. Ода нег сай арслнга нәәмн тонн хот-хол болн талдан чигн эд-тавр хаалһд йовна. МЧС-ин аца зөөдг машиг түрүн дөн күрглһнә төрәр үүлджәх Хальмгин штабын элчнр дахж йовна. Эндр эдн Краснодарск крайд күрхмн. Крымск балсһна һардачнрла дөн күрглһнә керг зөвшәргдв. Хамгин түрүнд кергтә хот-хол болн аюлд харһсн улст эрк биш кергтә талдан чигн эд-тавр йовулгдсмн. Тер тоод уудг усн, крупа, бичкдүдин үснә зүүтә продукц, дулан хувцн болн ааһ саав хулдж авгдв. Эн өдрмүдт усна аюлд харһсн улст буйнч секдлин дөн күрглһнә үүлдвр цаарандан күцәгджәнә. Министерствсин, ведомствсин, организацсин көдләчнр болн танһчин талдан чигн улс шишлнг расчетн счетд мөнгән йовулжана. Улан Кирсин Хальмгин әнгин һардач, оперативн штабын гешүн Валентина Будееван келсәр, кедү мөнгн йовулгдсна туск зәнг манһдур июлин арвн хойрла тархагдх. Буйнч седклин мөнгнә дөн күргсн улсас һурвн процент комиссинн мөнг авх зокалыг зогсахин тускар ода финансин учрежденьла ирлцнһү күүндвр кегджәнә.