ЖКХ-н халх шинрүлһнд дөн күргдг санг цаарандан чигн көдлх. Хальмг танһчд эн программ сәәнәр күцәгджәнә
ЖКХ-н халх шинрүлһнд дөн күргдг санг цаарандан чигн көдлх. Дөрвн жил хооран бүрдәгдсн санг хойр минһн арвн тавдгч жил күртл көдлхмн. Энүнә тускар президент Дмитрий Медведев зәнглв. Эндр өдрт Хальмг танһчд эн программ сәәнәр күцәгджәнә. Жил төгстл олн гермүдт капитальн ясвр кегдх. Ик чинртә кергин тускар мана зәнгч Нәдвдә Тамара келжәнә\\
Тагчг селәнә өрүнд зуг алх цоклһна ә сонсгдна. Троицкое селәнә әмтн иим әәд ижлдәд бәәв. Капитальн ясвр кех федеральн программд орсн хойр герт ноябрин эклцәр ясврин көдлмш эклв. Ода гермүдин терз-үүдн сольгдв, эрсн ширдгдв, хуучн модн терзин ормд шин пластикин терз углж тәвгдв. Хур чиг орсн цагт дусал дусдг гермүдин ора шинрүлгдж ясгдх. СНХ Эн күүкд күүнә келсәр, хур-цасн орхла герин ораһар дусал дусдг билә. Ода мана хурц төр хаһлгдв. Ясвр кехин кесгтән күләж.
Ясврин көдлмш эн жил төгсх зөвтә. ЖКХ-н санг мөнг йилһж өхгләрн иим болзгин неквр тәвж. Киитн үвлин өдрмүд көдлмшт боомтг болжахш. Октябрин дундурар мөнгн ирсн цагт ииг генткн киитрх гиж селәнә муниципалитетин һардвр санжасн уга. СНХ Троицкое селәнә муниципальн бүрдәцин администрацин толһач Андрей Дорджиевин келсәр, киитн өдрмүд тосхачнрт харш болжахш. Ясврин көдлмш темдглсн зураһар күцәгджәнә. Кергтә документац цаглань эс белн болнас көлтә көдлмш невчк ора эклв. Мөнгн ирсн бийнь, энүг олзлх арһ уга болад бәәв. Ода ясврин һол көдлмш экләд кежәнәвидн. Дөврн гер белн болв, ода дәкәд хойр герт капитальн ясвр кегдх.
Капитальн ясвр кехин төлә болн хуучн гермүдәс әмт шин патьрмудт нүүж орулһна төлә йилһж өгсн мөнгн мана танһчд күцц олзлгдв. Тегәд чигн ЖКХ-н халх шинрүлһнд дөн күрглһнә сангла болсн селекторн селвлцәнд мана танһч сән тоод йовна гиж келгдв. Федеральн программар йилһж өгсн мөнгиг эс олзлсн Әрәсән хөрн негн регион шоодврла харһв. Сүл хойр жилин эргцд мана танһчд тавн зун сай арслнг йилһж өггдв, эн мөнгәр хойр зун һучн нәәмн олн патьрмудта гер ясгдв. Хуучн гермүдәс болхла кесг зуг өрк-бүл шин гермүдт нүүж орв. Әрәсән президентин зәнглсәр, ЖКХ-н халх шинрүлһнд дөн күргдг санг хойр минһн арсн тавдгч жил күртл үүлдх. Ода министрмүдин кабинет ирлцнһү тогтавр белджәнә. Эн заканд орулгдх сольвр иргч жилин хаврар Государственн Думин депутатнр батлж авх зөвтә.
