Драмин болн шог наадна танһчин орсин театр шин театральн сезоһан шин наадар эклжәнә
Ода сойлын туск зәнг. Драмин болн шог наадна танһчин орсин театр шин театральн сезоһан шин наадар эклжәнә. Танһчин хәләһәчнр Николай Эрдмана бичсн «Самоубийца» пьесар тәвсн «Йир шогта тууж» нертә наад хәләж чадх. Ноябрин хөрн зурһанд болн хөрн доланд шин наад түрүн болж үзж болх.
Драмин болн шог наадна орсин театрин шин нааднд үзүлгджәх йоввдл мана өдгәц агин бәәдләс авгдсн әдл болж медгднә. Соевтин йосна цгт тогтсн бәәдл-жирһлиг үзүлжәх наадна һол төрнь -күүнә болн обшествин хәрлцән, күүнә чеежд болжах ноолдан, күнд бәәдләс һард арһ уга бәәдл болжана. Тегәд чигн Николай Эрдмана бичсн Самоубийца нертә пьесиг нег минһн найн хойрдгч жил күртл үзүлж болшго бәәсмн. Энүнә хөөн Валентин Плучек эн наадыг эврәннь Сатира нертә театрт тәвж чадв. Тиигхд наадн тас талдан чинртә бәәсмн. Ода болхла энүнд хаһлгдах төрмүд өдгә цагин күн болһнд өөрхн. Наадна һол Семен Семенович Подсекальниковин дүриг орсин театрин нертә актер Александр Шеглов нааджана. СНХ Әрәсән ачта артист Александр Шегловин келсәр, шин наад белдхд дегд күнд болв. Ямаран наадн болсна тускар удл уга медгдх. Хәләһәчнрин тоолвр күләжәнәвидн гиж актер келнә.
Шин нааднд театрин цуг артистнр орлцжана. Энүг белдсн цагт эдн ик көдлмш күцәв, гүн уха тунһах кергтә болв. Түрүн хәләцд эн үүдәвр шогта инәдтә болж медгднә. Болв энүнд гүн ухан-саната төрмүд хаһлгджана. Урднь орсин театрин сценд Марий Эл республикин искусствин ачта үүлдә Владислав Константинов орсин нертә драматург Александр Островскийн бичсн Свои люди — сочтемся наад тәвсн билә. Ода Йир шогта тууж нертә наад тәвжәнә. СНХ Драмин болн шог наадна орсин тетарин ах режиссер Владислав Константиновин келсәр, олн улсиг ямаран чигн цагт обшествин болн күүнә хәрлцән үүмүлдг бәәсмн. Ода сунһврин өмн маднд депутатнрин кандидатнр олн-зүсн сәәхн үг келж, дала юм күцәх үгән өгчәнә. Болв йос бәрхләрн эн улс сольж одна. Эн төр өдгә цагт ик чинр зүүжәнә. Театрин актермуд йир даавртаһар наад белдж көдлв гиж режиссер келнә.
Режиссерин тоолврар, актермудыг ямаран дүр наадхинь чикәр шүүж авч. Удл уга шин наадна түрүн үзүлвр болх. Тиигхлә эднә көдлмшиг үнлж болх.
