Зарһин приставмудын хооорнд бууһар халһна Өмн үзгин федеральн округин чемпионат Элстд болв
Элстд зарһин приставмудын хооорнд бууһар халһна Өмн үзгин федеральн округин чемпионат болв. Эн керг үүлдврт Әәдрхн, Краснодар, Волгоград, Ростов болн Адыгейн Республикин захд церглж йовх дөчн приставмуд орлцв. Диилвр бәрсн приставмуд Өмн үзгин федеральн округин командын ханьд орв, эдн Санкт Петербург балһснд бууһар хаһлһна марһанд орлцх зөв авсмн.
Иим марһан жил болһн болна. Энүг секлһнә йовудт Хальмгин зарһин ах пристав Анатолий Таранов нүр үг келв. Тарановин темдглсәр, зарһин пристав болһн зер-зев сәәнәр медж, энүнәс тов хах зөвтә. Дөрлдәнд талдан регионмудас ирсн гиичнриг Элст балһсн хальмгин авьясар тосв. Марһан байрин бәәдлд секгдснә хөөн, энүнд орлцачнр полигонд һарч йовв. Иим чемпионат болх гисн зар Әрәсән Өмн үзгин цуг регионмудт йовулгдсн билә. Тегәд цуг орлцачнр тохнята белдвр кеж. Хальмгин приставмудын федеральн церглтин приставмудын заллтин ахлачин дарук Олег бадма-Халгаевин келсәр, марһанд сәәнә белдхд цаг баһ болв. Давсн долан хонгт зуг хойр дәкж белдврин сурһуль болв.
Хальмгт болсн марһанд Астраханск, Волгоградск, Ростовск областьмудын, Краснодарск крайин, Адыгеин болн Хальмгин приставмуд дөрлдв. Дөрлдәнә зокалар командын ханьд һурвн залу болн хойр күүкд улс орх зөвтә бәәсмн. Ростов балһсна ирсн орлцач Светлана Порило келсәр, иим марһанд цугтан сән күцәмж бәрх зөвтә. Краснодарин элч Екатерина Курепина темдглсәр, дөрлдәнә зокалар түрүләд залу улс тов хана. Кемр тедн му үзмж бәрхлә, бидн командан харсх зөвтәвидн. Теегт түрүн болж дөрлджәнәвидн. Урднь зуг тиирт хадг биләвидн.
Иим дааврта марһанд цуг мергнән болн дамшлтан үзүлх зөвтә.
Макаровин нертә пистолетас хахд амр биш. Нег үлү зокалар зуг хөрн секунд күн болһнд өггднә. Эн цагт тавн халһн кегднә. Тегәд чигн орлцачнр болһн тов хахар зүткнә, командын тоод олн очко хоршах кергтә болжана. Марһан болсн өдр халун болв чигн, зарһин приставмуд сән күцәмж бәрхәр зүткнә. Волгорад балһснас ирсн орлцач Вячеслав Чечурина келсәр, бидн эрк биш диилвр бәрх санатавидн.
Болв аштнь волгоградцнр сән үзмж бәрж чадсн уга. Эдн зуг һурвдгч орм эзлв, хойрдгч ормд Ростовин элчнр һарв. Хамгин сән үзмж бәрәд, Краснодарин команд диилвр бәрв. Диилвр бәрсн зарһин приставмуд эн жилин зунар Санкт-Петербург балһснд болх цуг әрәсән чемпионатд орлцх зөв авч чадв.
Санкун Кермн, Очра Сергей
