Зарһин приставмудын болн алвна инспекцин көдләчнр шин байрин өмн өргнд бүртклһ кев
«Шил жилд өрн угаһар орх» иим нертә хамцу керг-үүлдвр зарһин приставмудын болн алвна инспекцин көдләчнр давулв. Шидр гипермаркетд ирсн Элст балһсна бәәрн әмтн энүнд герч болв.
Алвна инспекцин специалистнрин болн зарһин приставмудын дару-дарунь кедг хамцу керг-үүлдврмүдт элстихн ижлдәд бәәв. Сүл цагт эдниг бидн хотл балһсна уульнцд бол ник магазидт үздг болвидн. Тегәд олн улс кергтә болхла, удан чеерүдт зогслго, эврәннь өрән данцаж чаджана. Иим эв-арһ мана танһчд өдр ирвәс делгрлт авч, ахр болзгт өрән данцах арһ учрв.
Элст балһсна зарһин приставмудын әнгин ахлачин дарук Саглр Горяеван келсәр, иим хамцу керг-үүлдврмүд дару-дарунь болна. Иим керг-үүлдврмүд мадн байрин өдрмүдин өмн өргнд давулнавидн.
Ода Хальмг танһчд алвна, олн-зүсн даатхлһна мөнгнә, тер тоод Пенсион сангд орулж өгх өрн дегд ик кемжәнд дөрвн жува хойр зун арвн тавн минһн арслн тогтажана. Иим керг-үүлдврмүд олз-туста болна. Эн көдлмшин ашт зун минһн арслн ялын мөнг цуглулж авв.
Зарһин приставмудын пресс-секретарь Дельгир Бодгаеван келсәр, һурвн часин эргцд арвн дөрвн иск тогтаж авлавидн. Эннь маднд болн балһсна әмтнд туста болжана.
Тер мет өдгә цагт хөрн зурһан минһн иск зарһин приставмудын департаментд бәәнә. Эн искмудын мөнгнә кемжән һурвн арслнгас авн зу минһн арслн тогтажана.
Хавтхна Элла, Жамбин Дмитрий, Хулхачин Николай
