Зака эвдсн машина залачнр ода ик ялд унхмн
Июлин нег шинәс авн Әрәсән административн заканд сольвр орулгдв. Машиг ода шишлнг бәәрн үлдәх эс гиж зогсах кергтә болжана. Тер мет машина терзиг кемжәнәс икәр харнһдулх зөв уга болв. Иим улс ик ялд унхмн.
Һучн долан жилдән маши залжах Алексей Нармаевин тоолврар, хаалһд йовсн цуг улс әдл зөвтә. Зәрм жолачнр зокал медлго, зака эвднә. Юнгад гихлә, ода Элст балһснд машиһан үлдәдг һазр цөн, тер мет хаалһд кергтә темдг бас ховр. Алексей Нармаевин келсәр, хаалһд цуг темдгүд сәәнәр үзгдх зөвтә, зәрмдән иим темдг үзлго әмтн давад һарч одна. Тегәд энүг үзхд күнд болна. Иим темдгдүдин шар өнгәр ширдхлә сән болх гиж Нармаев тоолжана.
Энүнә темлдглсәр, зәрмдән хаалһ давж һархд йир әәмшгтә болна. Хаалһин зокалар машиаһан әмтн йовдг хаалһас тавн метр өмн үлдәх кергтә. Тиигхлә зеткртә йовдлмуд учршлго болжана. Болв ода эн туст бәәдл дегд ик әәмшгтә кевәрн үлдв.
Административн кодекст сольвр орулсинь Владимир Адучиев дөннжәнә. Болв хаалһст бәәдлиг тас талданар чиклх кергтә гиж эн тоолжана. Келхд, Владимр эврәннь өрк-бүлән танһчин больницд авч ирв. Болв машиһан тәвдг һазр энд уга. Автобусин зогсалд машиаһан үлдәх кергтә болна. Владимир Адучиевин келсәр, талдан һазрт машиһан үлдәж болхш. Арһ уга зогсалд үлдәх кергтә болна. Хаалһин тал дунд машиаһн үлдәдг арһ угалм гиж эн келнә.
Урднь автобусин зогсалд машиһан үлдәхлә, административн ял зун арслнг тогтажала. Ода болхла эн ялын кемжән арвн холванд икдв. Тер мет иим машиг шишлнг бәәрнд күргхмн. Хальмг танһчар ГИБДД-н инспектор Евгений Джамбиновин келсәр, июлин нег шинәс авн машин терз кемжәнәс ик харнһудулгдхла, иим жолачнр тавн зун арслнг ял өгх. Дәкәд болхла иим залачнр цааран машиһан йовдг зөвән геех, иим машидын тойгнь суһлж авгдх.
Шин закан һарсна хөөн тонировшик Тимур Шаплиевин көдлмш баһрв. Болв энүнә цәәлсәр, маши залачнр тавн арслнг өгхәр седжәхш. Иим әмтн техническ кемжәнә некрв күцәж машиндан харнһдулх цаас наажана. Тимур Шаплиевин келсәр, ода әмтн машина ардк терзд иим цаас наадг болв. Ялын кемжән өссинь цуһар меднә.
Иим көдлмш кехд бас дала мөнгн кергтә. машиа цуг терзмүд харнһдулхин төләд долан-нәәмн минһн арслнг кергтә болна. Зәрм терзд иим цаас наахла дөрвн минһн арслнг һарна. Иим кемжәнә неквр эс күцәсн улс ялд эрк биш унх. Болв ода күртл иим цааста машид Элст балһнд дала.
Ода деерән шин закана тускар аш келхд эрт. Тер бийн ялын кемжән икдсн закан маши залачнрт туслх гиж сангдна. Ода болхла машид болн әмтн йовдг хаалһс шинрүлх кергтә төр тәвгджәнә.
Азыда Надежда, Хавтхна Анатолий
